كازا كتحبس العشوائية فنقل المرضى بشروط قاصحة!.. سيارات إسعاف جديدة وممرضين وأطباء 24/24 .

كود ـ كازا//

فإطار تحسين الخدمات الصحية المرتبطة بالنقل الاستعجالي، خدام مجلس جماعة الدار البيضاء على إطلاق دفتر تحملات جديد لمرفق نقل المرضى والجرحى، باش ينظم القطاع، يرفع الجودة، ويضمن الشفافية فالأثمنة والخدمات، خصوصا بعد سنوات ديال الفوضى والعشوائية.

وحسب تصريح خاص لـ”كود”، قال كريم الكلايبي عضو مجلس مدينة الدار البيضاء، إن الهدف من هاد المشروع هو تقديم خدمة إنسانية وآمنة تليق بالساكنة، مع القطع نهائياً مع الممارسات غير القانونية. وأضاف أن دفتر التحملات الجديد كيعطي الأولوية للشركات اللي عندها مقر أو فرع فكازا وعندها تجربة، ويمنع الشركات الجاية من خارج المدينة من العمل داخل تراب الجماعة، مع فرض عقوبات صارمة على المخالفين.

وشدد الكلايبي على شروط صارمة لتحسين الجودة: توفير على الأقل 4 سيارات إسعاف ما يفوتش عمرها 5 سنوات، مجهزة بجميع المعدات الطبية الضرورية، مع إلزامية وجود ممرض فكل سيارة وحضور طبيب فالحالات الاستعجالية، وضمان الخدمة 24 ساعة على 24 وطوال أيام الأسبوع.

مصدر الصورة

وبخصوص التسعيرة، أكد الكلايبي أنها واضحة وموحدة: 500 درهم للنقل من الدار للمصحة أو السبيطار، و400 درهم من السبيطار للمصحة، وخارج كازا بين 7 و9 دراهم للكيلومتر، مع فرض إشهار التعريفة وتسليم وصل للمرتفق.

وفي هاد السياق، أشار المتحدث نفسه على أن المراقبة غادي تكون مستمرة عبر لجنة مشتركة فيها جميع المتدخلين، مع تطبيق عقوبات قد تصل حتى لفسخ العقد فحال الإخلال بالالتزامات. وختم بالقول إن هاد المشروع لعشر سنوات كيبرهن التزام المجلس بتوفير مرفق عمومي يحترم كرامة المواطن ويواكب تطلعات المدينة نحو الحداثة والشفافية.