خروج ايت منة فاذاعة فرنسية. راه النقاش ماشي علاش مشى يدافع على حصول المغرب على كأس افريقيا بل فينهم باقي رؤساء الاندية اللاعبين السابقين باستثناء حجي .

مصدر الصورة

كود مصطفى الشاذلي ////

بعد إعلان لجنة الاستئناف ب”الكاف” نهار 17 مارس 2026، تتويج المغرب بلقب كأس أمم إفريقيا 2025. قرار جا بعد تقديم الجامعة الملكية المغربية لكرة القدم لطعن وقررات اللجنة باللي منتخب السنغال خسر الماتش بنتيجة 3 − 0 (هاد الشي كاين فالمادة 84) بسباب الانسحاب، مع تعديل عقوبات انضباطية أخرى، بعد هاد الاعلان شفنا حملة غير مفهومة من جزء كبير من الاعلام الفرنسي ضد القرار.

نفهمو مرض الاعلام الجزائري اللي خدام عند جينرالات هاد البلاد، ولكن فرانسا مالها. علاش خذاتها قضية ومشات فالهيت ديالها. شفنا المدرب السابق للسينغال وللكاميرون الفرنسي كلود لوروا ولى محامي لمنتخب السينغال.

امام هاد الهجمة كان اللاعب الدولي ومساعد مدرب الاسود سابقا مصطفى حجي اول ما تصطى لهاد المدرب وخرج دافع على بلادنا. على القرار. على تطبيق القانون. بعدو دخل هشام ايت منة رئيس الوداد وبجوجهم كانو مع “ار ام سي” الفرنسية.

بجوجهم دافعو على عدالة القضية المغربية فهاد الكاس. بجوجهم دافعو على تطبيق القانون اللي حددو الاتحاد الافريقي. حجج المدافعين على السينغال والقول باللي الاتحاد الافريقي تعطل غير تخربيقة. كون دارها الاتحاد الاوربي لكرة القدم كون صفقو ليها. راه اتحاد عندو قوانين. خاص يسالي الماتش.

خاص المتضرر يجمع المعطيات ويقدم ملف قوي. كاين حكم ابتدائي واللي خاص اللي كيبثو فيه ياخدو وقتهم ويسمعو لكاع الاطراف. من بعد كاين الاستئناف وفيه مهلة وفيه حجم جديد لكاع المعطيات ومداولات ووو عاد اصدار القرار. شهرين اللي كتبان لشي وحدين كثيرة، راها قليلة فالحقيقة.

دابا نرجعو لخروج ايت منة فالاعلام. راه الخطورة ماشي تصريحاتو بل علاش ما شفناش رؤساء اندية اخرى تخرج دافع. كيفاش كلهم سكتو وتسناو الاشارات. هاد الموضوع ما فيهش اشارات. كان عليهم يخرجو يدافعو. يخرجو يشرحو هاد القضية. راه فهمها الاعلام الفرنسي والغربي فشي شكل.
مهمة الفاعلين فالكورة المغربية يخرجو يدافعو. الجامعة الملكية المغربية لكرة القدم دارتها مزيانة باش خرجات بيان ذكي وسكتات. اللي خاصو يدافع هو ايت منة. هما رؤساء الاندية. هما اللعابة السابقين للمنتخب. هما الفاعلين فالكورة. كانو يخرجو حتى وزراء سابقين للرياضة.

راه كاين محكمة “الطاس” اللي مشات ليها السينغال وكاين الراي العام. المغرب عندو باش يربح هاد المعركة.

خروج ايت منة فالاعلام الفرنسي راه تحسب ليه ودارها مزيانة بزاف وخاص بحالو يتبعوه. ديك النقاش واش خذا الاذن وواش عندو الصفة ما عندو اساس. كلنا فرحنا بتطبيق القانون وعودة الكاس. خاص كل واحد من بلاصتو يعبر على هاد الفرحة. بقات فاللي ضربو الطم