سيام 2026.. غايكون استثنائي هاد العام بفضل الخير ديال الشتا وضيف الشرف شريك بلادنا فتنظيم مونديال 2030 .

مصدر الصورة

كود الرباط//

علنات وزارة الفلاحة عن تنظيم الدورة الثامنة عشرة للملتقى الدولي للفلاحة بالمغرب (SIAM) بمدينة مكناس، ما بين 20 و28 أبريل 2026، تحت الرعاية ديال سيدنا وبشعار: “استدامة الإنتاج الحيواني والسيادة الغذائية”، مع اختيار البرتغال كضيف شرف لهذه الدورة.

وكتجي هاد الدورة بطابع خاص، حيث قررت الجهات المنظمة توسيع مدة الملتقى إلى تسعة أيام بدل سبعة، نظراً للإقبال الكبير اللي كيعرفو هاد الموعد الفلاحي سواء من طرف المهنيين أو العموم، بحيث غيتفتح من 20 إلى 28 أبريل للمهنيين، ومن 22 إلى 28 أبريل للزوار.

لكن الأهم فهاد النسخة هو السياق العام اللي كتنظم فيه، واللي كيتسم بتحسن كبير فالوضعية الفلاحية بفضل التساقطات المطرية المهمة اللي عرفها المغرب مؤخرا، واللي خلات التوقعات تشير إلى سنة فلاحية بامتياز مع نمو مهم لإقتصاد بلادنا.

السيام جا كذلك فسياق الفرحة والنشاط وسط الفلاحين وانتعاش فعدد من السلاسل الإنتاجية، خاصة المرتبطة بتربية الماشية والمراعي.

ومن المنتظر أن يعطي هاد الموسم الفلاحي الجيد دفعة قوية للملتقى، اللي غيكون أكثر تنوعاً وحركية سواء من حيث العارضين أو طبيعة المنتوجات والتقنيات المعروضة، فواحد الأجواء الإيجابية اللي ما كانتش حاضرة بقوة فسنوات الجفاف الماضية.

ووفق البلاغ، غتركز دورة 2026 على تطوير سلاسل الإنتاج الحيواني، خصوصاً ما يتعلق بالصحة الحيوانية والسلامة الصحية، وتحسين الأداء الاقتصادي والتقني لوحدات تربية الماشية، فإطار الرهان على تعزيز السيادة الغذائية.

كما يُرتقب أن تعرف هذه الدورة مشاركة حوالي 1500 عارض يمثلون 70 دولة، إلى جانب تنظيم أكثر من 40 ندوة، ما يعزز مكانة “سيام” كموعد فلاحي دولي بارز يجمع مختلف الفاعلين وصناع القرار والشركاء الدوليين.

باختصار، سيام 2026 غيكون مختلف، دورة موسعة، ضيف شرف أوروبي مشارك مع بلادنا تنظيم مونديال 2030، وسياق فلاحي إيجابي كيراهن عليه المغرب باش يعطي نفس جديد للقطاع، وسط تفاؤل كبير وسط الفلاحين اللي رجعات لهم الحيوية هاد العام.