ديما يوقع شي حدث فبلادنا كنلقاو شي وحدين خدامين عند الشيخة موزة من مغاربة او عرب كيعطيونا الدروس. كيولي فمهم محلول. هاد العينة اللي كتسترزق فالخليج وخاصة عند القطريين حقاش هما اللي ديما مصدعينا، ما سمعنا ليهم صوت. ما نشرو حتى خبار خبار على اش واقع عندهم فالدوحة او غيرها.

شي وحدين ديما كينظرو حتى فامور كبيرة عليهم بحال السياسة الداخلية لدول ديموقراطية فالغرب الجميل وكيكتبو على السيسي وكينتاقدو انظمة كثيرة الا نظام قطر اللي على رأسو الشيخ تميم واللي كان دار انقلاب على بوه.

قطر اللي ما عندها ريحة الديموقراطية وكتحل فمها من خلال “الجزيرة” و”العربي” ووسائل اعلام اخرى شارياها وشارية معاها صحافيين مرتزقة يسبو انظمتهم، دارت مع القصف الايراني ليها حالة طوارئ. اي مرتزق خدام عندها ممنوع عليه ماشي غير يصور شي انفجار او ضربة، بل ينشر لخبار او بيارطاجيها.

حسب وكالة الانباء الفرنسية فقطر وقفات أكثر من 300 شخص من جنسيات مختلفة بتُهم “تصوير وتداول ونشر معلومات مضللة”، وفق ما أعلنته الأسبوع الماضي. طبعا كنعرفو اش كتعني “معلومات مضللة” فنظام بحال النظام القطري

لكن كيفاش دولة عندها الجزيرة كتغطي كاع احتجاجات واحداث العرب وشمال افريقيا وما قدراتش تصور فيديوات حداها.

وزارة الداخلية القطرية تابعة كل مقيم لان المقيمين ماشي مواطنين كاملي المواطنة كيف كاين فالغرب، وكانت قالت فبيان قبل ايام باللي “إدارة مكافحة الجرائم الاقتصادية والإلكترونية بالإدارة العامة للمباحث الجنائية” تمكنت “من ضبط 313 شخصا من جنسيات مختلفة، وذلك على خلفية قيامهم بتصوير وتداول مقاطع مصورة، ونشر معلومات مضللة وشائعات وما من شأنه إثارة الرأي العام”.

على الاقل هادوك المرتزقة اللي خدامين قالجزيرة القطرية واخواتها يخرجو غير يقولو رايهم. ما يقدروش. ايلى داروها ما كاين لا قضاء لا والو. الطيارة وخوي لبلاد.

نفهم ان الامارات العربية المتحدة تكون صارمة. هي ما كتعطيش الدروس بحال مالين الجزيرة. واضحة من اللول. حتى هي شدات من خلال شرطة أبو ظبي في الإمارات العربية المتحدة أكثر من 100 شخص من جنسيات مختلفة، بتُهم تصوير وتداول معلومات غير صحيحة عبر منصات التواصل الاجتماعي خلال الحرب المستمرة في الشرق الأوسط.
شرطة ابو ظبي قالت باللي ضبطات “اكثر من 109 أشخاص من جنسيات مختلفة قاموا بتصوير مواقع وأحداث وتداول معلومات غير صحيحة عبر منصات التواصل الاجتماعي خلال الأحداث الجارية، الأمر الذي من شأنه إثارة الرأي العام ونشر الشائعات بين أفراد المجتمع”.

وأعلنت أنها اتخذت “الإجراءات القانونية والإدارية اللازمة بحقهم، في إطار الجهود المستمرة التي تبذلها الجهات الأمنية في رصد ومتابعة المخالفات المرتبطة بإساءة استخدام وسائل التواصل الاجتماعي”. وأكدت شرطة أبو ظبي أن هذه السلوكيات “تُعد مخالفة للقوانين والتشريعات المعمول بها”.

وكان أمر النائب العام الإماراتي، قبل أيام، بتوقيف ومحاكمة عاجلة بحق 35 شخصا على الأقل بتُهم تداول “محتوى مضلل” وتصوير ونشر لقطات من الهجمات، إضافة إلى “الترويج لدولة تمارس أعمال العدوان العسكري وتمجيد قيادتها وأعمالها العسكرية”.

الامارات ديما واضحة فهاد النقطة. ماشي بحال قطر اللي خلقات “الربيع العربي” ودعمات الاخوان المسلمين وحضنات كاع اشكال التطرف عندنا فشمال افريقيا والدول العربية

دابا ضرباتها ايران الحليفة ديالها ضربات الطم وكتشد كل واحد غير عبر على رأيو.

عليها ف”كود” ديما ضد تلقي الدروس من مغاربة او غيرهم عايشين فانظمة كتعتابر المهاجرين فيها مواطنين من الدرجة الثانية بحال قطر