فوزي لقجع المغربي اللي تقاتل باش يطبق القانون فاتحاد افريقي للكورة كلو صراعات ودفاع على مصالح. رفض الظلم ووقف على شغلو وجاب خبراء القانون ورافع بلى ما ينسى يحضي من الغدر .

مصدر الصورة

كود مصطفى الشاذلي ///

قرار لجنة استئناف العقوبات التابعة للاتحاد الإفريقي لكرة القدم “كاف” البارح ب”اعتبار منتخب السنغال خاسرا للمباراة النهائية برسم منافسات كأس الأمم الإفريقية (المغرب 2025)، واعتماد نتيجة (3-0) لفائدة الجامعة الملكية المغربية لكرة القدم” وعليه منح كأس افريقيا للامم للاسود عوض السينغال، ماشي قرار نزل من السما.

ايلى كاين شي واحد فالبلاد آمن بتطبيق قوانين الكاف خاصة ” المادتين 82 و84 من نظام كأس إفريقيا للأمم” فلفضيحة اللي دارها منتخب السينغال فالفينال ديال كأس افريقيا يوم 18 يناير 2026 بملعب مولاي عبد الله بالرباط، فهو رئيس الجامعة الملكية المغربية لكرة القدم فوزي لقجع.

لقجع اللي وفى بوعدو باش تكون “الكان” المغربي الاحسن فالتاريخ، آمن باللي هاد الاتحاد الافريقي لكرة القدم “الكاف” ممكن تطبق فيه قوانينو الداخلية.

رئيس الجامعة الملكية المغربية لكرة القدم ما مشاش يسب ويوزع الاتهامات فوسائل الاعلام كيف دار رئيس الاتحاد السينغالي الي واخا ربح الكاس اتهم هاد الاتحاد بتهم خطيرة، بل سكت. اكثر من هاد الشي، الجامعة الملكية المغربية لكرة القدم ما خرجات حتى بيان توضيحي او ادانة فالموضوع.

كان خرج جوجت البيانات ديال الديوان الملكي فالموضوع وانتهى الكلام فهاد الشي.

رئيس الجامعة الملكية المغربية لكرة القدم خدم فالصمت. كان مآمن بقوة الملف المغربي بصلابتو. وجد باحترافية كبيرة كاع التفاصيل من مكتب المحاماة حتى تفاصيل التفاصيل اللي ممكن تأثر على القرار.

حتى باش خرجات لجنة العقوبات بقراراتها ابتدائيا، كان واعي باللي المعركة القانونية طويلة. دار بيان واحد وحافظ على حرفيتو. فهاد البيان باللي الجامعة الملكية المغربية لكرة القدم غادية تستانف القرار.

استمر فالخدمة. وجد ملف صوليد. استافد من بعض الهفوات فطريقة خدمة الفريق المغربي ابتدائيا. زاد ايمانو بعدالة قضية المنتخب. كان لقجع طيلة هاد الجولة متبع كلشي. فمقر الاتحاد الافريقي لكرة القدم بالقاهرة راه كاينة تيارات وصراعات ومصالح. لقجع كان همو تطبيق القانون ولا شيء غير القانون وداك الشي لاخر يبعد من لجنة الاستئناف وما يأثرش عليها.

كانت الشروط كاملة مجموعة باش هاديك لجنة القعوبات تخدم بلا تأثير لا توجيه. طبق القوانين انطلاقا من المعطيات اللي عندها وديك اللي جمعاتها من شهادات المعنيين بالامر من مغاربة وسينغاليين وحكم الماتش……

لفوزي لقجع الفضل باش ربحنا جولة من جولات هاد المعركة القانونية. المغرب انطلاقا من البارح 17 مارس 2026 ولى هو الفائز بكأس افريقيا الاخيرة. طبعا مازال جولة اخيرة حاسمة فالمحكمة الرياضية الدولية “طاس”. فهادي غادي يكون غير سيادة القانون. لقجع كيعرف هاد المحكمة. عارف باللي الحكم مرتابط اساسا بقوة الملف المقدم.

المغرب عندو ملف متكامل. الاتحاد السينغالي لكرة القدم قال باللي غادي يدير استثئناف عند هاد المحكمة. هاد الشي موجد ليه رئيس الجامعة.

الجامعة ديالنا كانت حرايفية حتى فالتعامل مع هاد القرار التاريخي اللي بسبابو المغرب ولى هو الفائز بكأس افريقيا للامم. دارت بيان متوازن عقلاني ذكي. ما سبات ما اتهمات شي جهة. شفنا الحكومة ديالنا ما هدراتش فهاد الموضوع.

ماشي بحال السينغاليين حكومة واتحاد كرة القدم….. بداو يتاهمو ويسبو ويشككو. هادي حيلة اللي عارفين قضيتهم مهزوزة. لقجع بعد بيان قصير البارح غادي يكون بيان اخر بعد اجتماع المكتب المديري للجامعة.

بوجود لقجع تغيرات العقلية ماشي غير فالكورة. المستحيل ما بقاش مغربي فالتيران وبالحياة. خدام الدق والسكات. اللي دارو فهاد الملف كان كبير بزاف وبالقانون. عليها حاسدينا عليه فمصر وتونس والسينغال بلا ما نهدرو على الجزائر وزيد وزيد