مالين البومبات سبقو الزيادة وطلعو الثمن.. المازوط وصل 12 درهم فسلا والمواطنين جاو يعمرو قبل ما تدخل زيادة الاثنين .

منذ

كود الرباط//

بداو بعض مالين محطات الوقود فاستغلال خبر الزيادة المرتقبة فأسعار المحروقات، واللي غادي تدخل حيز التنفيذ ابتداءً من منتصف ليلة الأحد-الاثنين، حيث تقرر ترتفع أثمان الكازوال (المازوط) بحوالي جوج دراهم فاللتر، والبنزين (ليصانص) بحوالي 1.44 درهم.

وحسب ما عاينت “گود”، وصل ثمن المازوط فبعض المحطات بمنطقة العيايدة بسلا حتى لـ12 درهم للتر، رغم أن الزيادة الرسمية مازال ما دخلاتش حيز التطبيق، وهو ما اعتبره عدد من المواطنين استغلالاً للخبر ومحاولة “يسبقو العرس بليلة‘‘.

وشهدات بعض المحطات توافد عدد من السائقين والمواطنين اللي جاو يعمرو قبل دخول الزيادة الجديدة، خصوصاً مهنيي النقل اللي كيعتامدو بشكل كبير على الكازوال.

وكانت ’’گود” نشرت، حسب مصدر من مهنيي النقل، أن القطاع توصل بإخبار رسمي يفيد بأن أسعار المحروقات غادي تعرف زيادة ابتداءً من 00:00 ديال ليلة الاثنين، حيث يرتقب يرتفع ثمن الكازوال بحوالي جوج دراهم، فيما البنزين غادي يزيد بحوالي 1.44 درهم للتر.

وكتجي هاد الزيادة، حسب نفس المصدر، نتيجة الارتفاع القوي اللي عرفاتو أسعار النفط فالأسواق الدولية خلال الأيام الأخيرة، خصوصاً مع التوترات الجيوسياسية فـالشرق الأوسط بعد الحرب الإيرانية، والتخوفات من تأثيرها على سوق الطاقة العالمية.

ورغم الزيادة المرتقبة، أكد مصدر “گود” أن تموين السوق الوطنية بالمحروقات مستقر، موضحاً أن المغرب كيتوفر حالياً على مخزون احتياطي من المواد النفطية يكفي لحوالي شهر من الاستهلاك، ما كيعني أن الزيادة مرتبطة أساساً بالسوق الدولية وليس بنقص فالإمدادات.