حزب الأصالة والمعاصرة دار خاويا ف عامرا لحركة جيل زيد ومطالبهم. على بعد 6 أشهر فقط على الانتخابات التشريعية المقررة رسميا فأواخر شتنبر المقبل، مازال حزب البام كيعاني من سيطرة نفس الفريق باش دخل انتخابات 2021 للي طاغيين عليه الأعيان وصحاب الشكارة واللي لاصقين فالكراسي وللي البعض عندهم ملفات قضائية ومنهم للي متابعين فملفات الفساد.

البام، للي كان عندو خطاب إبان “حركة GenZ212 ” فشتنبر وأكتوبر للي فاتو، وللي كان قال فيه بللي كيدعم مطالب الشباب فالصحة والتعليم ومحاربة الفساد، ومازالين كاملين كنتدكرو خطابات الوزير بنسعيد والبرلمانية رئيسة المجلس الوطني للحزب نجوى كوكوس، هاهو نفس الحزب اليوم كيتنصل من وعوده بدعم ترشيح الشباب أقل من 35 سنة.

فالأيام الماضية، تسربات لائحة أولية ل 90% من التزكيات للي ناوي الحزب يعطيها للمرشحين باسمه للانتخابات التشريعية ديال مجلس النواب. هاد اللائحة فيها غير نفس البرلمانيين الحاليين وللي أغلبهم أعيان وصحاب الشكارة وشراف وفيهم للي متابعين فقضايا فساد.

أشنا هي الرسالة للي بغا البام يوصلها لشباب GenZ212 وغيرهم من الشباب للي كيتسناو من الأحزاب السياسية تنفذ الوعود ديالها لتمكين الشباب من الولوج إلى البرلمان؟ واش هذا قرار سياسي من الأحزاب باش يقولو للشباب بللي خاصهم يشوفو مع وزارة الداخلية للي كانت الوحيدة للي قررات تدير دعم حقيقي لترشيح الشباب أقل من 35 سنة في الانتخابات المقبلة فإطار لوائح مستقلة ومدعومة ب 35 مليون سنتيم؟

حزب البام، بهاد القرارات، كيبين أنه حزب مغلق وما كيتفاعلش مع الالتزامات ديال بلادنا تجاه ضمان الحق في المشاركة السياسية للشباب وولوجهم لمراكز القرار.

وراه نفس القرار خداه الحزب تجاه النساء بعدما قرر يلوحهم للوائح الجهوية عوض يمنح لهم التزكيات كوكيلات لوائح فالدوائر التشريعية.

هاد الشي راه مخجل لواحد الحزب ياحسرة كيقول هو للي غا يتصدر النتائج ويقود الحكومة المقبلة. باش؟ بالأعيان وصحاب الشكارة.

مهم ماشي غير البام للي داير هاد الخطوة، حتى الاستقلال والحركة الشعبية والاتحاد والبي بي اس. وحتى الاحرار غايعاود نفس تشكيلة 2021 واخا فيها الشباب، اغلب الاحزاب، ان لم نقلها كلها همشات جيل زيد.