بنعبد الله ولشكر وعلم الكرسيولوجيا.. كثرة الجلوس فوق الكرسي كتسبب البواسر السياسية .

مصدر الصورة

فاطنة لويزا ـ كود//

تفرجت فواحد الحوار ديال الرفيق نبيل بنعبد الله مع موقع إخباري، ومنكدبوش أن نبيل مقارنة مع شلا أمناء عامين ديال الأحزاب كيعرف يدوي، ويغمق، ويسوق لراسو، غير هو وكان جا حتى لنقطة ديال أنه أكثر من 15 عام وهو أمين عام ديال حزب التقدم والاشتراكية، وهو يطبز ليها العين.

الرفيق لي من بداية الحوار وهو كيقدم نفسو حداثي ديمقراطي، ومناصر لقضايا الديمقراطية والنساء والشباب، كيبرر استمرارو فرئاسة الحزب بأنه مستعد يعطيه للشباب، ولكن طرح سؤال: واش قادين على هاد الأمانة؟

أولا ماشي بالضرورة أنه لي يجي من بعدك يكون صغير فالسن، واخا غتكون إشارة زوينة، ولكن على الأقل ديرو التداول على رئاسة الحزب، والتقدم والاشتراكية على الأقل حزب مزال عندو أطر ديالو لي تدرجت فالهياكل الحزبية، وموجودة في المكتب السياسي، يعني ما كاينش غير انت بوحدك.

ثانيا، هاد قضية واش الشباب يقدو عليها؟ حشومة واحد بثقافة نبيل بنعبد الله يقولها.

ناخدو غير الأحزاب السياسية اليسارية في أوروبا لي نبيل كيكون ضيف في المؤتمرات ديالهوم، أغلبهم الرؤساء ديالهوم مواصلينش لخمسين سنة، وفيهم لي مزال في الثلاثينات، وهادو كيسيرو أحزاب عندها مسؤوليات فين تبان مسؤولية التقدم والاشتراكية.

أحزاب لي كتقود حكومات، أو عندها مقاعد معتبرة في البرلمان الأوروبي، وكتساهم في إنتاج القرارات في منطقة مهمة للاقتصاد العالمي، وفي ظرفية حساسة جدا.

في ظل النظام السياسي لي عندنا، ولي دستوريا كاين صلاحيات كبيرة عند الملك، وحتى لي عند الحكومة جزء كبير منها كيدخل في المجال المحفوظ للملكية بحال الخارجية والأوقاف، وحتى الداخلية، ولي العسكر والبوليس والدرك بعيد على الحكومة، ففي ظل هادشي، تدبير حزب سياسي ماشي شيحاجة خارقة.

راه رئيس أي حزب ما كيقوم غير بتدبير التزكيات الانتخابية، وصياغة البرنامج الحزبي، والأنشطة لي كتقوم بها المنظمات الموازية، وتدبير المفاوضات حول المشاركة في الحكومة.

زعما إذا كانت عندنا أحزاب ديمقراطية ومتطورة، ففي ظل النظام السياسي الحال، الحزب كيحتاج إلى التدبير الإداري والتقني وشوية ديال الدراية بالنسق السياسي القائم.

وإذا كان حزب بتاريخ التقدم والاشتراكية مقدش يخرج أطر لي يقومو بهاد الأدوار، فغير يهبط الريدو ديال الكاراج.

وبحال هاد الكلام كان ادريس لشكر برر البقاء ديالو على كرسي حزب عبد الرحيم بوعبيد وعبد الرحمان اليوسفي والمهدي بنبركة وعمر بنجلون ومحمد اليازغي.

المبرر العبيط ديال ماكاينش شكون يهز الحزب حاليا.

الله ياودي، الحزب لي عطا للدولة وزير أول، ووزراء، وسفراء، ومسؤولين ديال مؤسسات استشارية وطنية، وديال مؤسسات عمومية كبيرة، ما قادرش من 2012 فاش طلع لشكر للرئاسة يخرج ولو إطار واحد يسير الحزب.

إذا كان هاد المبرر صحيح، فهذا حجة أنكم خاصكوم تمشيو بحالكوم، حيت فاشلين في تسيير حزب.

قوة الاتحاد الاشتراكي والتقدم والاشتراكية والاستقلال تاريخيا، ماشي حيت كانو فالمعارضة، ولكن حيت بالفعل كانو عندكم أطر كبيرة.

واخا كان عندوهم الزعيم مكيحيدش إلا بالموت، وهي حالة التقدم والاشتراكية مع علي يعتة، والاستقلال مع علال الفاسي ثم امحمد بوستة، والاتحاد الاشتراكي مع عبد الرحيم بوعبيد، فمعمرهوم كان عندهوم مشكل ديال الخلافة.

وحتى ديك خلود الزعيم في الكرسي في الستينيات والسيعينيات والثمانييات كانت مقبولة نوعا ما في السياق التاريخي آنذاك، لي كانت الكاريزما عندها دور كبير في الصراع السياسي.

اليوم الأمور ولات مرتبطة بالإنجاز، ماشي بالقدرة على الخطابة او التنوعير.

والمشكل هو ملي كيكون لا كاريزما، لا تدبير جيد، وهو حالة لشكر مثلا.

مزال التقدم والاشتراكية والاستقلال عندوم أطر، أما الاتحاد الاشتراكي فاش كتشوف المكتب السياسي كتجيك البكية، وفاش كتقرا افتتاحيات الجريدة الناطقة باسمه، والأوراق لي كينتجها، فكتحسر على الأيام لي كانت الدولة والمعارضة والنخب كلها كتسنى أش غيقول الاتحاد الاشتراكي.

نبيل بنعبد الله وادريس لشكر كان عليهوم يقراو الدرس لي قدمو عبد الواحد الراضي، ومولاي إسماعيل العلوي.

عبد الواحد الراضي واخا كان ديما على يمين قيادة الاتحاد الاشتراكي، ولكن كان أكثر واحد عارف مصارن الدولة والحزب بزوج، بحكم علاقاتو مع الحسن الثاني ومع عبد الرحيم بوعبيد بزوج.

ومع ذلك، الوقت لي فهم أن الحاجة إليه ما بقاتش، لا حزبيا، ولا من طرف الدولة، حيت الوقت تبدلات، انسحب بهدوء وبلا صداع، وهو من هو، دوز رئاسة مجلس النواب، ووزارة العدل، ومفاوضات حكومة التناوب، وكان مستشار غير معلن للحسن الثاني.

مولاي إسماعيل العلوي، كان من المؤسسين ديال التقدم والاشتراكية، من زمن الحزب الشيوعي المغربي، ثم حزب التحرر والاشتراكية، وكان اليد اليمنى ديال علي يعثة، وكان من المهندسين ديال حكومة التناوب، ودوز زوج وزارات صعاب، لي هوما التعليم والفلاحة، وفي ظرفية دقيقة، وحافظ على وحدة الحزب بعد وفاة علي يعتة، ولكن في 2010 فهم أن الوقت تبدلات، وأن الحزب خاصو دماء جديدة، وسلم الحزب لمن؟

سلمو لنبيل بنعبد الله، لي الوقت لي شد مولاي إسماعيل العلوي الحزب كان نبيل هو رئيس الشبيبة الاشتراكية.

يعني مولاي إسماعيل وجد رئيس الشبيبة ديال الحزب باش يكون أمين عام مستقبلي ديال الحزب.

السؤال واش نبيل بنعبد الله اخدم على هادشي مع الشبيبة أو مع القطاع النسائي ومع الأطر؟

نفس السؤال ممكن نطرحوه على ادريس لشكر..