العلاقة بين الواليدين والأبناء فالمجتمعات ديالنا كاتبنى على بزاف ديال المغالطات ولا القوالب بالعربية تاعرابت واكبر مغالطة (قالب) هوا ديال رضاة الواليدين، لي بزّاف ديال المغاربة كايستعملوه كنوع من الابتزاز العاطفي لولادهم، باش يبقاو تحت طوعهم! رجال وعيالات كاتلقاهم بعقلهم وكبار وبولادهم وديورهم وقالت ليه مّو شّا شّا رّا رّا مع العلم أنه أصلا مّو ولا بّاه راه فأغلب الأحوال المعرفة ديالو بالحياة والتجارب ديالو الإنسانية محدودة جدا، كاتلقى مو الإنجاز الوحيد لي دارت فواحد ثمانين عام د ليگزيسطونس هي بقات مقابلة الكوكوط فالكوزينة وبّاه تاهوا فوت ليه غا مدينتو ولا دوّارو واحرفتو باش كاياكل الخبز ماكايفهم فحتى شي حاجة اخرى… ناس كبار قادين ياخدو قرارات فحياتهم وكاتلقاه خاصو مّو تڤاليدي ليه المرا باش يتجوج بيها وخاصو بّاه يطبع ليه على الدّار باش يشريها وماقادش ياخد قرارات مصيرية فحياتو بلا مايرجع لواليديه وواخا قرارات واليديه يكونو غالطين خاصو يقبل بيهم ويحني راسو…. داخلت عليكم بالله واش هادي علاقة سوية بين ناس راشدين؟ طبعا لاّ.

العلاقة بين الواليدين والأبناء خاصها تبنى على الاحترام والحب فقط، ماكايناش شي حاجة اخرى، ماكاينش امتنان وماكايناش ديك الهضرة ديال ولكناك وشربناك وكسيناك وسبطناك! راه نتا لي جبتيه لهاد العالم الكئيب بزز منك توكلو وتشربو راه المينيموم هاداك! ماشي خيرية منك! مابغيتيش توكلو وتشربو ماتولدوش أصلا. الاحترام مهم بزّاف فالعلاقات بين الناس وخصوصا بين الواليدين والأبناء، كايضمن أن العلاقة بيناتهم تكون سوية وماضّر حتى واحد فيهم. الأبناء مايضروش واليديهم ومايكونوش عبئ عليهم وطبعا الواليدين كذلك.

أما “الرضى” هذا ماخاصوش يكون كمفهوم أصلا، الرضى باش وعلاش؟ راه المنطقي هوا الواليدين يقلبو على رضى الأبناء ماشي العكس، نتا قررتي أنك تجيب طفل هاد العالم الكئيب والحياة العامرة أمراض وحروب ومجاعات ومشاكل وستريس، واش درتي فيه خير؟ طبعا لاّ! راك جايبو أصلا لسكويد گايم ماشي ديزني لاند! الواجب ديالك كأب وأم أنك توقف معاه وتعطيه الحب والحنان والدعم النفسي والمعنوي والمادي باش يواجه هاد الحياة لي أصلا صعيبة، ماشي تزيد تصعبها عليه، لا نتا علمتيه كيف يصطاد سمكة ولا نتا عطيتيه ديك السمكة، لا نتا غير خليتيه منو للحياة تفعل فيه كيما بغات.