ظاهرة الحمل السطحي عند القاصرات فالمغرب من القضايا اللي مضروب عليها الطم، وخا أنها كتقيس بزاف ديال الدريات وحتى الدراري اللي كيلقاو راسهم متورطين، هاد الظاهرة كتكشف اختلالات كبيرة فالتربية الجنسية، وفالعلاقات الحميمية، وضعف التواصل وسط العائلات، وكتبيّن باللي بزاف ديال القاصرين اللي ما عندهمش ثقافة جنسية، مني كيغيو “يكحّلوها” وكيعمّيوها .

الحمل السطحي، أو ما يُسمّى شعبياً بـ“التشراب”، كيوقع غالباً بسبب الجهل بالثقافة الجنسية. بزاف من القاصرات كيكونو باغيين يحافظو على “بكارت ابيهم” حتى كيلاقيو راسهم حاملات بلا ما يقصدو ،هاد الشي كيوقع من بعد ممارسات جنسية سطحية ” التزلاق”ولكن علمياً ممكن دير حمل.

حسب تقارير ديال جمعيات بحال التضامن النسوي ومؤسسات حماية الطفولة، كيتسجلو كل عام مئات الحالات عند دريات أقل من 18 سنة، مع ارتفاع حالات الكورطاج فظروف خطيرة ، عدد كبير منهم كيكونو عزبات، حتى كيلاقيو راسهم حاملات بلا كيعرفو كيفاش وعلاش، الشي اللي كيشكل خطر كبير عليهم من جميع الجوانب.

من الناحية الصحية، القاصر ما كتكونش واجدة جسدياً للحمل والولادة، وهاد الشي كيعرّضها لمضاعفات بحال النزيف، فقر الدم، ومشاكل صحية خطيرة، وحتى الخطر على حياتها فبعض الحالات ، اما نفسياً، كتعيش الخوف من الفضيحة، الضغط الاجتماعي، والإحساس بالذنب، وشي مرات كتدخل فحالة اكتئاب حاد، وتقدر حتى تنتحر إلا ما لقاتش اللي يوقف معاها .

اجتماعياً، بزاف من هاد البنات كينقطعو على القراية، وكيتقصاو من المجتمع، وكيولّيو أمهات وهم مازالين صغار ،المستقبل ديالهم كيوقف بكري، وكيضيعو فرص العمل والاستقرار، وكيعيشو فالهشاشة والفقر ،عوض ما يتلقاو المساعدة والتوجيه، الخوف من سلطة المجتمع كيخلّي البعض منهم يهربو حتى يفكو حريرتهم.

المقاربة الزجرية اللي كتمنع العلاقات برا إطار الزواج، وكتجرم للإجهاض، زيد عليها غياب التربية الجنسية فالمؤسسات التعليمية، كلها عوامل كتساهم فاستمرار هاد الظاهرة، داكشي علاش راه ضروري يكون نقاش مجتمعي، وتكون التوعية الجنسية فالمؤسسات والسوشل ميديا لي هي اقرب طريق لهاد الفئة ،ومراجعة فالقوانين لي كتقيس هاد الموضوع ،باش نحافظو على سلامة هاد الفئة لي بغا تكتشف الحياة حتى كتلقا راسها واحلة .