الشعوذة من ديما كانت فالمغرب، و من ديما كانو عندها ناسها و الكليان لي كايتعاطاوها، فحال فبزاف ديال البلدان، غير هي كانت كاتمارس فالخفاء نوعا ما، حيت لا لّي كايمارسها لا لّي كايتعاطاها ماكان راضي بيها ( بعيدا عن مسألة انها ممنوعة قانونيا)، كاين منها واحد النفور مجتمعي ( نفاق و صافي حيت بزاف كايتعاطاو ليها و لكن قليل لي كايعتارف بالشغف لي عندو لضريب الكارطة و طرطيق اللدون و ما جاورهما) . دابا لاّ، خصوصا مورا مابان تيك طوك، الشعوذة ولاّت كاتمارس بالعلالي و الخيل تشالي، المرفودة كاتصوّر من الكّرنة حتى كاتذبح، الليلات ديال حمادشة وولاد خليفة و الفقها و الشوافات ولاو نابتين اكثر من الحريگة فمنصات التواصل الاجتماعي، أما لاطحتي على شي فيديو فأنستاغرام و تعطلتي فيه أكثر من ثلاتة د الثواني، اعرف راسك أنه غايتناك ليك الالغوريثم و غاتولي بلهلا يطرّيه ليك داخل للعالم السفلي ديال الليلات و هزان الخط و ضريب الكارطة و حتى ضريب المسوس، ايوا طلب التسليم آ ولد عمّي!

و العجيب فهاد الصحوة التاشوّافتية، هوا أنها جابت معاها واحد النوع ديال المثليين الرجال لي دارو ريمونتادا تاريخية على العيالات، ماكاين غي ولد الحاجة مليكة، الشريف الزعري، الشريف ولد الميمة عيشة، كلهم ولاّو شرفا و كلهم ولّاو زوهريين و كلهم ولاّو فقها ! و آطونسيون، هنا كايبان الدور ديال المعتقد فتبرير الممارسات لي المجتمع كايرفضها، و كيفاش الانسان كايلتاجأ لشي تفسيرات “غيبية” لظواهر و لا سلوكيات ماقادش يعتارف بيها، حيت دابا هاد المثلي راه ماكايقوليكش انا مثلي نيشان و هاشتاغ لا للفصل 489، لا هوا كايقوليك فيه الحال آ سيدي، مسكون، فيه المّيمة عيشة، فيه ميرة الحارثية، يعني لا بان ليك كايبغي المسوس راه ماشي هوا راه المّيمة لي عزيز عليها المسوس. شفتي القوالب كي دايرين فحال ديك القضية ديال “الراگد”، المرا كايغبر عليها راجلها طناشرعام و كاتولد من الزلاّل و فاش كاتبان الكرش كاتگوليك “الراگد” و طبعا المجتمع راه كايشجع هاد المعتقدات حيت مسلكاه. الناس راه عارفينها باش منفوخة و لكن فنفس الوقت ماباغينش يصدعو ركهم مع هادشي. و فاش كاتولي ماشي نتا لي مثلي راه حقا الميمة عيشة، ديك الساعة راه اوطوكاتيكمون كاتحيد عليك المسؤولية ديال الميول الجنسي ديالك و حتى داك الاحساس بالذنب لي ممكن تحس بيه.

نرجعو لموضوعنا ! فشكل هاد الريمونتادا لي داروها المثليين على العيالات فعالم الشعوذة ياك ؟، كاتبين ليك بشكل واضح انه “المثلي” البلدي هوا داك

Le gardien du temple

ديال الممارسات لي العيالات براسهم غادين و كايتخلاّو عليهم، ايه طبعا مازال بزاف ديال العيالات كايمارسو و كايتعاطاو للشعوذة، و لكن كانظن انه لأول مرة فتاريخ المغرب الرجال غايتفوقو عليهم فهادشي ! و الله الا خاص شي دراسة سوسيولوجية على “الدور ديال المثلي المغربي البلدي” في الحفاظ على الثرات، حيت قدما كايبانو ليا العيالات كايتخلاو على بزاف ديال الممارسات البالية فحال الشعوذة و الگديدة و شعبانة و الرفيسة ببيض السمّان و التمياق و المعاطيات و التخمال ديال رمضان، قدما كايبان ليا المثلي المغربي البلدي مصرّ انّه يحافظ عليها و يصورها و يحطها لينا فاليوتوب و انستاغرام بل و كايبدع فيها فحالي ولينا كانشوفو دابا مع الشرفا الجدد لي دخلو لعالم تاشوافت.

فاش كانو العيالات لي شادين هاد لاكتيڤيطي، كانو الجنون دراوش كايطلبو ليك غا فروج كحل و جوج بيضات بلديين و ستمية دريال و كايتقضى الغرض لي مطلّگ يجوجوه و لي مجوج يطلگوه، دابا مع الريمونتادا الرجالية، و الله يا مّك و مادرتي للملوك طبلة فيها جوج قراعي ديال بلولابيل ستة د القراعي ديال دجاك، عشرين كازابلونكا و زوقتي الطبلة بالباكيات فيريرو روشي لا تقضات ليك شي ملوة ! يا الله ! وا زيد معاهم ! الدرويش مسكين مايسحرش فهاد البلاد !