كيعيشو سكان دوار بن بوشعيب التابع لجماعة البخاتي بإقليم آسفي وضعية صعيبة بسبب ضعف شبكة الاتصال وغياب تغطية الجيل الرابع (4G)، فمشكل ولى كيأثر بشكل مباشر على الحياة اليومية ديالهم وخلاهم فواحد الحالة لي كيعتابروها “عزلة رقمية” طال أمدها.

عدد من المتضررين أكدو بلي دارو شكايات متعددة لشركة اتصالات المغرب عبر الرقم 888، ولكن حسب قولهم ما كان حتى تجاوب فعلي ولا حل ملموس على أرض الواقع. وزادو وجّهوا شكاية رسمية للوكالة الوطنية لتقنين المواصلات عبر البوابة الوطنية للشكايات، غير أن الوضع بقى كيف ما هو، بلا تغيير يُذكر.

وفـ 12 نونبر 2025، جا تقني تابع للشركة للدوار وعاين الوضع ميدانيا، لكن حسب إفادات متطابقة من الساكنة، تصريح منسوب ليه زاد من حالة الاحتقان، بعدما قال لأحد السكان: “إلا مخدمتش ليكم اتصالات المغرب سيرو لانوي”، فإشارة للوكالة الوطنية لتقنين المواصلات. الساكنة شافت فهاد الكلام نوع من الاستخفاف بالمطالب ديالها، خصوصا وأن المشكل مطروح من مدة وما لقا حتى حل.

السكان كيشتاكيو من غياب 4G بشكل كلي، والاكتفاء بشبكة 3G ضعيفة، وزيد عليها رداءة المكالمات الهاتفية داخل الديور، الشي اللي كيأثر على التلاميذ والطلبة فالقراية ديالهم، وعلى المواطنين فالإجراءات الإدارية والخدمات المهنية، خاصة فظل الاعتماد الكبير على الخدمات الرقمية.

وأكدت الساكنة كذلك أن ضعف الشبكة ماشي مرتبط غير بشركة وحدة، بل حتى شركات أخرى كتعاني من نفس المشكل فالمنطقة، وهو ما كيعمّق الإحساس بالتهميش الرقمي وكيطرح تساؤلات حول العدالة المجالية فتوفر خدمات البنية التحتية للاتصالات.

جمعية الدوار سبق ليها راسلات رئيس جماعة البخاتي بطلب موقع من طرف المتضررين، كما تم توجيه مراسلة القائد باش يتم رفعها لعمالة إقليم آسفي، ولكن لحد الساعة ما كان حتى تحسن ملموس.

وأمام هاد الوضع، كتجدد ساكنة دوار بن بوشعيب مناشدتها للجهات المسؤولة، وعلى رأسها شركة اتصالات المغرب والوكالة الوطنية لتقنين المواصلات، باش يكون تدخل عاجل لرفع الضرر، وتوفير تغطية عادلة بخدمة 4G وتحسين جودة المكالمات، حيث الاتصال والإنترنت ولى حق أساسي وما بقاش ترف فهاد العصر الرقمي.