الحكومة غادي تطلق برنامج ديال الدعم والمواكبة لفائدة الناس اللي تضرّرو من الفيضانات فشمال وغرب المملكة، بسبب التساقطات المطرية الغزيرة والاستثنائية اللي عرفتها البلاد خلال الشهرين اللي دازو.

وجاء فبلاغ لرئاسة الحكومة، نهار الجمعة، باللي مختلف القطاعات المعنية تجندات باش يتطبق هاد البرنامج فظروف مزيانة، بعدما تدار تشخيص دقيق للوضعية فالميدان وحاجيات المواطنين المتضررين.

وتقرر صرف مساعدات مالية مباشرة كتوصّل حتى لـ6.000 درهم لكل أسرة، و15.000 درهم لإصلاح المساكن والمحلات التجارية الصغيرة اللي تضرّرات، و140.000 درهم لإعادة بناء الدور اللي طاحو بسبب الفيضانات.

وبخصوص المساعدة المالية الاستعجالية اللي غادي تبدا تتصرف ابتداءً من الأسبوع الجاي، خاص ربّ الأسرة يبعث رسالة نصية قصيرة للرقم 1212، فيها رقم البطاقة الوطنية للتعريف الإلكترونية وتاريخ الازدياد ديالو، باش المصالح المختصة تقدر تتحقق من وضعية الأسرة وتدرس الطلب وتبتّ فيه فأقرب وقت.

أما الدعم المتعلق بإعادة تأهيل المساكن والمحلات التجارية الصغيرة، وإعادة بناء المساكن المنهارة، فغادي تتكلف به لجان محلية مختصة غادي تقوم بإحصاء ميداني دقيق فالمناطق اللي تصنّفات منكوبة، ومع إمكانية تقديم المعنيين بالأمر لطلبات ديالهم باش تتدرس وفق الضوابط المعتمدة، فإطار الشفافية والإنصاف.

وفالمجال الفلاحي، غادي يتم إطلاق برنامج ديال الزراعات الربيعية اللي كيتماشى مع خصوصيات المناطق المتضررة، بحال الزراعات الزيتية والقطاني والزراعات الكلئية، مع دعم اقتناء البذور والأسمدة باش يتدارك الموسم الفلاحي، والاستمرار كذلك فدعم الكسابة اللي تضرّرو.

وكيجي هاد البرنامج، حسب البلاغ، فإطار العناية الملكية اللي كتهدف لتنظيم وتدبير عملية إجلاء ونقل المواطنين المتضررين بطريقة استباقية كتراعي درجات الخطورة، مع تسخير جميع الوسائل اللوجستيكية باش يتم نقل الناس فظروف مزيانة، إلى حين رجوعهم لمنازلهم فأقرب الآجال.