بنضو إمبراطور الفروماج اللي بدا بالتهريب عند قاضي التحقيق. حزبو البام متواطأ معاه باش مخليه وهو معول على السمسار لملايري اللي مستغل الصحافة وكان عاون مراتو فالبيزنس .

مصدر الصورة

كود – هناء ابو علي ///

اليوم نشرات “شوف تيفي” خبار باللي بن الضو الامين الجهوي لحزب الأصالة والمعاصرة فجهة كازا وإمبراطور الفروماج تحال على قاضي التحقيق باستئنافية كازا . لخبار فيه باللي القضية عندها علاقة بنشاطو التجاري اي لفروماج.

حسب معطيات ل”كود” فهاد الملف كبير وبزاف. عقلتو هادي كثر من عامين باش الفرقة الوطنية مشات لشي سلعة ديالو فميناء طنجة المتوسط وكان عددهم كبير. حسب مصادر “كود”، راه القضية مرتابطة. كانت خرجات خيارات ومنها شهادة واحد خدم معاه باللي كيبدل التيكي ديال السلعة اللي كيجيبها من برا

بن الضو بدا حياتو مهرب. خدم فالتهريب. كان كيجيب لفروماج من الشمال. طبعا ماشي كلشي صالح اللي كان كيدخلنا من اسبانيا. دار حانوت فجوج فدرب غلف ومازال عندو لحد الان

بن الضو ولى ملايري بزاف بزاف. دابا راه ماشي غير هو اللي تحقق معاه من الاثنين حتى اليوم، كاين مسير فشركتو.

يعني المحققين هادي كثر من عامين وهما متبعينو. دابا قاضي التحقيق كيحقق معاه بعد خدمة الفرقة الوطنية.

لفضيحة انو معول على ملايري سمسار كيستغل الصحافة باش يطلب عليه. هاد بن الضو كان عاون السمسار باش دير مراتو البيزنس ديالها ضواحي كازا.

بن الضو كيدعي كذلك باللي صاحبو وكلاء الملك كثار كيتلاقاهم فريسطو فگوتيي وكيقول فلقاءاتو باللي وكيل الملك فعين السبع فكازا وغيرو صحابو بزاف

من غير هاد الادعاءات اللي كيطلقها باش كيكون فديك الريسطو، راه البام متواطأ معاه. كيفاش مخلينو امين عام جهوي وهو فقضية خايبة بزاف مازال ما بانتش گاع تفاصيلها

كيفاش بنت الباشا جرات على ابو الغالي اللي كان معاها فالأمانة العامة واخا القضية ديالو اللي كانت مع هاد بن الضو على ارض وما دارت مع هادا والو وهو عند قاضي التحقيق كيحقق معاه فقضية خطيرة بزاف كتهم صحة لمغاربة.