ارتفاع منسوب مياه واد سبو داير استنفار فسيدي قاسم.. عمليات إجلاء الناس بعدد من الدواوير متواصلة فجماعة الحوافات .

عمر المزين – كود///

كتواصل من البارح الأحد بجماعة الحوافات التابعة لإقليم سيدي قاسم، عمليات إجلاء المواطنين من عدد من الدواوير، فإطار التعبئة القصوى اللي دايراها السلطات الإقليمية والمحلية، تزامناً مع الارتفاع الكبير فمستوى مياه واد سبو.

السلطات المحلية ركّزات الجهود ديالها على تنفيذ إجلاءات وقائية وسريعة للأسر اللي ساكنة حدا ضفاف الواد، خصوصاً فدواوير الحميديين، الدرارسة، العزيب والصحراوي، فين تنقلو السكان لمناطق آمنة ومجهزة بكل الضروريات.

وعرفات هاد العملية تعبئة ميدانية كبيرة، شاركو فيها عناصر القوات المسلحة الملكية والدرك الملكي والوقاية المدنية والقوات المساعدة، بتنسيق محكم مع السلطات الإقليمية والمحلية، باش يتأطرو عمليات نقل المواطنين وتمر فظروف منظمة، مع تسخير جميع الإمكانيات اللوجستيكية والموارد البشرية باش تتضمن سلامة الناس وممتلكاتهم.

مصدر الصورة

وكتفيد السلطات المحلية أنه بالموازاة مع عمليات الإخلاء، غادي يتم توزيع مساعدات غذائية أساسية على الساكنة اللي تحاصرات بالمياه وتقطعات عليها الطرق المؤدية للدواوير ديالها، وهي مناطق ماشي مهددة مباشرة بالغمر، ولكن كتعيش العزلة بسبب ارتفاع منسوب الواد.

وكتجي هاد الجهود فإطار المخطط الاستعجالي الواسع اللي دايرينو بإقليم سيدي قاسم، واللي الهدف ديالو هو تأمين النقاط الحساسة وتقليل الآثار ديال التقلبات الجوية الأخيرة على الساكنة القروية والبنية التحتية، حسب ما جا فقصاصة ديال وكالة المغرب العربي للأنباء.

ومازال السلطات الإقليمية والمحلية فحالة تأهب قصوى، كيراقبو تطورات الوضعية الهيدرولوجية ديال واد سبو ساعة بساعة، ومستعدين للتدخل الفوري وتقديم الدعم اللازم للساكنة فكل وقت إلا دعات الضرورة.