لبارح فاطمة الزهراء المنصوري، المنسقة العامة لحزب الأصالة والمعاصرة، فكلمتها خلال المجلس الوطني لحزبها، وجهات خطاب قاصح وكررت كلمة “الغدر”، وقالت بلي حزبها “ماشي غدار ووفي للتحالف وللقيم”، وشارت بلي حزبها مكايديرش رجل فالمعارضة ورجل فالأغلبية.

مصادر “كود” كشفات بلي كلام المنصوري مكانش اعتباطي ولا غير خضرة فوق الطعام، بل مساج سياسي للحلفاء ديالها فالأغلبية، وللي حسب مصادر “كود” ناضت مؤخرا حروب بين الوزراء من مختلف مكونات التحالف الثلاثي، مكاين غير شد لي نقطع ليك.

آخر هاد الحروب، كانت كشفات عليها “كود” فاش وقعات أزمة داخل مجلس الحكومة على مواد مشروع قانون عارضها وزير من الأحرار حيث كتعلق بمهنة كينتمي ليها، واللي أكدها مقرب من وزير استقلالي لـ”كود”.

وحسب نفس المقرب من الوزير الاستقلالي، تشبكات بين وهبي ومصطفى بايتاس، الملتحق حديثا بمهنة المحاماة. ماشي غير فقضية قانون المحاماة، كذلك كانت ملفات كثيرة فيها صداع، وف الأخير كيلتجأو لتحكيم رئيس الحكومة، أو وساطة وزير “حكيم” في الحكومة.

هاد الوزير “الحكيم” اللي قوي وسط الحكومة، ممكن يتدخل كذلك فهاد الأزمة ديال المحامين ويتفك الصداع. خصوصا وأن مصالح الدولة والمواطنين فخطر مع شلل المحاكم بهاد الإضرابات المتتالية لي دايرين صحاب البذلة الكحلة.

الحروب حتى فطريقة توزيع بعض المشاريع، بحيث كانت هضرة تقالت فالكواليس بلي نزار بركة، وزير التجهيز والماء، مشا للسرعة القصوى فتمويل مشاريع طرقية فجماعات معينة لضمان تصويت سكانهم لحزب الاستقلال، وهادشي قلق البام قبل الأحرار، ونفس الشيء بالنسبة لبعض المشاريع ذات طبيعة اجتماعية أو فلاحية.