رسميا اليوم لاربعا 28 يناير مع لحداش و59 دقيقة دالليل يسالي الوقت اللي حددو حزب التجمع الوطني للاحرار باش يحطو المرشحين لمنصب رئيس الحزب ترشيحهم. حتى الساعات الاولى فهاد الصباح مازال ما حط حتى شي حد ترشيحو حسب مصادر تجمعية ل”كود”. كان البارح اجتماع مصغر لقادة الحزب باش يداولو فالاسم او الاسماء المرشحة.

اليوم مع لطناش دالنهار غادي يكون اخر اجتماع للمكتب السياسي قبل معرفة المرشحين او المرشح للمنصب واللي نهار 7 فبراير غيولي او تولي رسميا رئيسة الحمامة.

الاتجاه العام حتى حدود هاد الساعة هو يكون مرشح متوافق عليه. غالبا غيكون مرشح يحظى بدعم الرئيس الحالي عزيز اخنوش. البارح لثلاث فتقديم كتاب “مسار الانجازات” بمقر الحزب بالرباط كان رئيس الحزب ناشط ومتحرر. كيبان ماشي غير حيد عليه شي ثقل ولكن حتى الرئيس المقبل كتاضح صورتو عندو.

اللي أكيد ان رئيس الحزب بعد 7 فبراير =مؤتمر الحزب بالجديدة= ما غاديش يكون رجل الاعمال مولاي حفيظ العلمي. مصادر مقربة منو اكدات ل”كود” باللي ما عمرو كانت عندو نية يترشح. نفس المصادر اكدات ل”كود” باللي هاد ليام اي البارح واليوم وحتى الاحد الجاي ما كاينش فالمغرب وباللي فزيارة مهنية كتعلق بالبيزنس ديالو خارج المغرب.

دابا رسميا العلمي ما معنيش بالرئاسة. نشوفو نادية فتاح وزيرة الاقتصاد والمالية. حتى هادي لحد الساعة ما باغياش هاد المنصب. كاين اللي كيدفع بيها ولكن مازال رافضة. كلشي ممكن يوقع فالدقايق اللخرين.

محمد اوجار يقدر يكون باغي الرئاسة ولكن عندو تاريخ كحل فالولاءات فالحزب. كان ضد عصمان باش ترشح المنصوري وعكاشة لخلافتو. من بعد ولى ضد المنصوري ومع مزوار صلاح الدين. من بعد ولى ضد مزوار باش وصل اخنوش.

كاين وجوه شابة ولكن ضعيفة سياسيا او ما مقبولاش داخليا بحال بايطاس مصطفى ولا محمد الشوكي.