غياب مرشح بديل لـ"أخنوش" فرئاسة الأحرار رون المشهد الحزبي.. البام والاستقلال تالفين وكولشي كيستنا شكون يجي بلاصتو .

منذ

كود الرباط//

علمت “كود” من مصدر مطلع أنه مور أيام من “التستر” على شكون يجي بلاصت عزيز أخنوش، فرئاسة التجمع الوطني للأحرار، من المرتقب أن يتم الإعلان على المرشح “المتوافق” عليه، غدا الأربعاء. وغالبا ف اجتماع المكتب السياسي.

ولكن لحد الساعة، حسب مصادر “كود”، مكاين حتى مرشح قدم راسو للجنة التحضيرية للمؤتمر، علما أن آخر آجال لتقديم الترشيحات هو غدا الأربعاء 28 يناير 2028.

الغريب وفق مصادر “كود” هو أن للي مبرزطين وضرهم راسهم بهادشي للي واقع فالأحرار، هم أحزاب التحالف الحكومي، البام والاستقلال، للي شداتهم التلفة ومافهمو والو من قرار أخنوش بعدم الترشح لولاية إضافية. وكولشي كيسول شكون يجي بلاصتو.

هاد القلق فأحزاب الاستقلال والبام وحتى شي وحدين فالمعارضة، مرده أن الأحرار باقي محافظ على تماسكه الداخلي، وعندو قدرة تنظيمية ولوجستيكية ومالية باش يعاود يربح الانتخابات المقبلة.

أما باقي الأحزاب لي فالمعارضة، خصوصا لي مولفين يعارضو شخص أخنوش وماشي حكومتو، للي اختارو يكونو ف صف “الشعبوية المهداوية” وتصفية “سمعة” رجل أعمال اختار التغيير بطريقتو ويخوضو حروب ضدو بالوكالة. فراه مابقا عندهم شي دور دبا حتى يوصلو الانتخابات.

للي تلف كثر هاد الاحزاب، هو أن أخنوش فالمهام ديال فرئاسة الحكومة، زاد من وتيرة العمل، وكثر الأنشطة ومتبع الصغيرة والكبيرة، ومصر يكمل حتى لآخر ساعة من عمر الولاية الحكومية الحالية. مدارش بحال بنكيران وتقلق ولا دار بحال زعماء اختارو العزلة السياسية. فرق بين العمل الحزبي والواجب الدستوري كرئيس حكومة.