بنعبو لـ"كود": الموارد المائية للي متوفرة دبا كتقارب 8161 مليون متر مكعب والمغرب مزال كيسجل تباين كبير بين الأحواض المائية وخا كاين تحسن عام .

عمر المزين – كود///

قال محمد بنعبو، الخبير فالمناخ أن موارد مائية متوفرة كتقارب 8161 مليون متر مكعب وبنسبة إجمالية لملء السدود فالمغرب واصلة لـ48.6%، بدات كتبان بوادر ديال تعافٍ حذر فالموارد المائية اللي باينة للعين، ولكن وضعية الفرشة المائية الباطنية ما خرج حتى شي بلاغ رسمي كيأكد التعافي الكلي وتجاوز عتبة الخطر، خصوصاً فالمناطق اللي عرفت استنزاف حقيقي للموارد المائية ديالها ففترة الجفاف.

وكيضيف بنعبو فـتصريحو لـ”كود” أن المغرب مازال كيسجّل تباين كبير بين الأحواض المائية رغم التحسن العام، بحيث كاينين أحواض بحال اللوكوس وسبو بنسب ملء عالية، بينما باقي الأحواض الأخرى مازالين كيعانيو وكيحملو آثار وبصمة سنوات الجفاف.

وكيقول بنعبو فـتصريحو أن حوض اللوكوس كيتصدر الأحواض الأكثر امتلاء، بنسبة ملء كتقارب 64.70%، وبمخزون كيتجاوز 1,23 مليار متر مكعب، وسجلات عدة سدود فالحوض نسب عالية حتى لـ100%، من بينها سد وادي المخازن بـ672 مليون متر مكعب، وسد الشريف الإدريسي بـ121 مليون متر مكعب، بينما سد دار خروفة ما كتفوتش نسبة الملء ديالو 27% بحقينة إجمالية كتقارب 132 مليون متر مكعب، وهاد الشي غادي يعزز الأمن المائي والغذائي لساكنة المنطقة الشمالية.

مصدر الصورة

وفي المقابل، كيأكد الخبير بنعبو أن معدل الملء فـحوض ملوية وصل لحوالي 38,6%، بمخزون كيقارب 276.80 مليون متر مكعب، وهاد الشي كيبين أن الجهة الشرقية، اللي من بين أهم المناطق الفلاحية وطنياً، ولات من بين أكثر المناطق المهددة بتدنّي مؤشر الأمن المائي، وغادي يكون عندو تأثير سلبي على توفير المياه، خصوصاً ديال السقي، حيث مازال كبريات السدود فحوض ملوية كيسجلو نسب متفاوتة، بحال سد محمد الخامس بـ54% وسد الحسن الثاني بـ15%.

أما بالنسبة لحوض سبو، كيقول بنعبو أنه من أكبر الأحواض المائية فالمملكة، وسجّل مخزون كيتجاوز 3.22 مليار متر مكعب، بنسبة ملء كتقارب 58%، ولكن حتى هو كيعرف تفاوتات واضحة بين السدود، بحيث سجّل سد الوحدة 61% بحقينة إجمالية واصلة لـ2.166 مليار متر مكعب، وسد إدريس الأول 48% بحقينة كتفوق 550 مليون متر مكعب، بينما سد علال الفاسي قريب يكون عامر كامل.

وكيشدّد بنعبو أن حوض أم الربيع مازال كيعاني من ضغط كبير، حيث ما فاقت نسبة الملء الإجمالية ديالو 24,50%، وبحقينة إجمالية كتفوق مليار ومائتي مليون متر مكعب، رغم تسجيل تحسن طفيف فشي سدود، وهاد الشي كيعكس استمرار الهشاشة المائية فهاد الحوض.

وفي الجنوب، كيقول بنعبو فـتصريحو أن مخزون حوض سوس ماسة وصل لحوالي 385 مليون متر مكعب بنسبة ملء فحدود 52,50%، بينما سجّل حوض درعة واد نون نسبة ملء كتقارب 30,60% بحقينة إجمالية واصلة لـ321 مليون متر مكعب، وكيأكد أن نسبة ملء سد مولاي علي الشريف ما كتفوتش 18%، وحتى سد المنصور الذهبي مازال بنسب ضعيفة، وهي أرقام – حسب تصريحو – كتعكس تحسّن نسبي ولكنها غير كافية لمواجهة الإكراهات المناخية والطلب المتزايد على الموارد المائية فالمغرب.”