و كانتفهم گاع آليات الدفاع النفسي لي بنادم كايديرها دابا كنوع من أنواع “التبراد على الرّك” كولاّ تاني على حساب فهامتو و جهدو فهادشي ديال فنون التبراد على الرّاس.

“خسرنا المباراة و لكن ربحنا تنظيم واعر بشهادة الجميع”، واخا برّد ليا على راسك، “سحرو لينا “واخا آ الحاجة برّدي تانتي على راسك، ” دياز دارها بلعاني حيت كون ماركا كانت غاتنوض الروينة” اوك بيبي برّد ليا على راسك، ” السينيغال ماشي ربحو الكاس حنا عطيناهم الكاس” واخا خويا المهم هوا تبرد ليا على كرّك، ” حنا خاصنا نلعبو مع أوروبا حنا” هانية خويا كلامك هوا الكبير ! “عندنا احسن تيرانات 🥲” صافي حبيبة آجي عندي نعنقك و بكي ! ” كون ماركا دياز كون دوك الدراري ديالنا فالسنييغال ماتو مساكن 🥲” كاينة ! تانتي آجي عند طاطا نعنقك و بكي ! ” القافة تسير و الكلاب تنبح” واخا آ حنيني قول لي بغيتي.

الخسارة كانت قاصحة على گاع المغاربة، و بزّاف د الناس ماواجدينش نفسيا باش يشوفو الحقيقة و الواقع و يقولو بلي خسرنا ! خسرنا الكاس فتيرانّا وسط بلادنا وسط جمهورنا، خسرنا الكاس لي خمسين عام و حنا كانحلمو بيه و السينيغال جات لوسط البلاد و دات الكاس عن جدارة و استحقاق. صافي هادي هي القصة الحقيقية و الباقي تفاصيل.

كانتفهم گاع آليات الدفاع النفسي لي الغرض منها التبراد على الكرّ و تفادي القول بلي ” خوراتنا السينيغال فبلادنا وسط تيرانّا”

و لكن مايجيكمش عاوتاني متلازمة ” لالجيري” ( خت متلازمة سطوكهولم لي ختارعتها انا فمعهد ثنين شتوكة للدراسات السوسيولوجية ) و نزيدو فيه لدرجة نروجو ديك الهضرة ديال “غايبان ليا شي عزي فالطريق غاندفل لمّو فوجهو” و لا ” لي لقا شي عزّ/ي يصرفق مّو”. راه ماشي معقول غير خسرنا غانزيدو فوق من الخسارة القباحة و الحگرة لي أصلا ماقادّينش عليها.

المغرب ماشي جزيرة، و المغرب ماغايلعبش فأوروبا و المغرب ماشي بوحدو لي كايتطوّر فإفريقيا، و المغرب اقتصاديا و سياسيا محتاج لعلاقات ديبلوماسية متينة مبنية على المصلحة مع دول الجوار و بزاف ديال المغاربة خاصهم يجمعو راسهم من الهضرة الخاوية و التعنصير و الحگرة و يفهمو بلي خسرو فالكورة حيت السينيغال كانت احسن و عرفات تستغل الفرص لي ضيع المنتخب الوطني… صافي، ماغانديروش “طاحت الصمعة، علقو الكحلات لي كايركبو الظفار فباب مراكش” آش جاب كعّو لبعّو ؟

انا عارفة بلي بزاف ديال المؤثرين عندنا دماغهم مكسل فيه حمار و كايعاودو هاد الهضرة بلا مايفكرو فيها و فشنو ممكن يطرا لا فعلا بنادم ناض كايجيّش بعضياتو باش يهجم على الكوحل لي كاينين فالمغرب و لكن خاص الدولة تتدخل و تمنع هاد الديسكور من الانتشار حيت راه كايتناقض حتى مع مصلحة الدولة و التوجهات ديالها فإطار الهجرة و العلاقات جنوب-جنوب و يقدر يسالي بشي جريمة تمسح گاع داك المجهودات لي درتو باش تبينو المغرب زوين و مستعد يستقبل تظاهرات قارية و عالمية كبيرة.

و لا بقينا بهاد العقلية العنصرية و هاد الاخلاق راه التظاهرة الوحيدة لي غانقدرو ننظمو فالمستقبل هي موسم مولاي قبُتين.