شبكة المحامية "لوميم" اللي نصبات على أزيد من 360 واحد تورطات فقضايا نصب جديدة: قاضي التحقيق تابع أفرادها وها وقتاش غادي تبدا محاكمتهم .

مصدر الصورة

عمر المزين – كود///

علمت “كود”، من مصادر مطلعة، أن عادل مخبر، قاضي التحقيق بالغرفة الثالثة بـالمحكمة الابتدائية بفاس، تابع مؤخراً ثلاثة أشخاص كانوا كينشطو ضمن شبكة إجرامية متخصصة فالنصب والاحتيال على رجال الأعمال بمدينة فاس، واللي كتترأسها المحامية “أسماء لوميم” من هيئة فاس.

وحسب ما كشفت عليه مصادر “كود”، فإن المسؤول القضائي تابع المتهمين الثلاثة قدّام غرفة الجنح التلبسية من أجل “تعدد جنح النصب”، ومن المرتقب يمثلوا قدّام نفس الغرفة نهار 30 يناير الجاري، بعدما تأجلت أول جلسة ديال محاكمتهم الأسبوع اللي فات، بسبب استدعاء المتهم الثالث اللي قرر قاضي التحقيق متابعته فحالة سراح، مع استدعاء باقي المشتكين.

نفس المصادر أوضحت لـ”كود” أن عدد الضحايا فهاد الملف الجنحي التلبسي الثقيل وصل لحدود دابا لـ34 ضحية، مع الإشارة أن الملف السابق اللي تحكمت فيه المحامية لوميم وشركائها وصل عدد ضحاياه لأكثر من 360 ضحية، بعدما قام المتهمون بإنشاء شركة تجارية وهمية استعملوها كواجهة للإيقاع بالمواطنين اللي باغيين يشريو سيارات وشاحنات جديدة ومستعملة.

وكانت الشبكة كتقدم وعود وهمية ببيع المركبات بأثمنة منخفضة، بدعوى أنها محصلّة عليها من شركات كراء السيارات أو من مزادات عمومية، الشي اللي خلاها تستولي على مبالغ مالية فاقت 17 مليون درهم، دون الوفاء بالالتزامات ديالها.

الأبحاث كشفت كذلك أن الموقوفين تقاسمو الأموال اللي تحصلو عليها من الضحايا، بدون ما يوفرو المركبات اللي تم الاتفاق عليها، مع الإشارة أن تفكيك هاد الشبكة الإجرامية من طرف عناصر الفرقة الجهوية للشرطة القضائية بفاس جا نتيجة لمعطيات دقيقة وميدانية وفرتها مصالح المديرية الجهوية لمراقبة التراب الوطني المعروفة اختصارا بـ”الديستي”.