النهائي الأغلى وقيلة فتاريخ "الكان". تيكي الفينال الدرجة 3 وصلات ل7 الاف درهم. شناقة المارشي نوار وصلوها لأرقام خيالية .

أنس العمري -كود///

نهائي كأس إفريقيا للأمم “الكان” ولى حديث الساعة فالمغرب، ولكن قبل ما يكون موعد فرجة وحلم كروي، ولى حتى قصة غلاء خيالي ومضاربة فالبيي.

فهاد الماتش اللي غادي يجمع المنتخب الوطني بنظيرو السينغالي، غدا لحد مع الثمنية فملعب الأمير مولاي عبد الله بالرباط، تذاكرو منوضة ضجة متسببين فيها “شناقة” المارشي نوار.

فمع تأهل أسود الأطلس لهاد النهائي الحلم، من بعد الفوز على منتخب نيجيريا، ولات هاد التيكيات سلعة نادرة، والمقاتلة عليها فالسوق السوداء. من داخل المغرب وحتى من الخارج، المغاربة كاملين ولى عندهم هدف واحد: يحضرو للنهائي ويدعمو المنتخب من المدرجات.

ومع طلقات صافرة نصف النهائي، خرجو سماسرة المارشي نوار، وبداو كيعرضو التذاكر بأثمنة كتبدا من 7 آلاف درهم وهي طالعة. وكلما اقترب موعد الماتش أكثر، الثمن مازال كيزيد يطلع.
مصدر الصورة
وقصص البحث على التيكيات ولات كثيرة، من بينها مغربي مقيم فبريطانيا، اضطر يخلص، على حساب ما علمت “كود”، 7100 درهم فتيكي وحدة، غير باش يكون نهار الأحد فالرباط ويعيش أجواء النهائي ويدعم الأسود من قلب الملعب.

“كود” دخلات للغروبات لي كينشطو فيها سماسرة المارشي نوار. وسولات، التذكرات لي تفاوضت عليها مكتلقاهم غير بـ 4500 درهم للفوق، والسقف حاليا واصل حتى 10 آلاف درهم.

أما التيكي ديال كاتيكوري 1 لقات شي وحدين معروضين للبيع بـ 15 ألف درهم للوحدة. هادو اثمنة البارح الي تصايب فيها هاد الموضوع ماشي اثمنة نهار قبل الماتش

فيما واصل ثمن تذكرة “السكاي بوكس” أو المقصورة الخاصة، اللي كتوفر خدمات ضيافة مزيانة، كثر من 30 ألف درهم للتذكرة الواحدة.
مصدر الصورة

وفنفس الوقت، عرفات الرباط توافد عدد كبير من المشجعين اللي جاو من الخارج، خصوصا من فرنسا، خلال الساعات الأخيرة، وبداو كيقلبو على التذاكر عبر الغروبات وصفحات مواقع التواصل الاجتماعي، اللي ولاو فضاء مفتوح للسماسرة.

وما وقفش الغلاء غير عند التذاكر، حتى تذاكر الطيران طلعات، بحيث عرضات بعض شركات الطيران رحلات ذهابا وإيابا بين باريس والرباط بحوالي 10 آلاف درهم. ورغم هاد الأثمنة، الحجوزات كبيرة، والطائرات اللي جاية للمغرب مرتقب تكون عامرة عن آخرها.
مصدر الصورة
نهائي “الكان” ولى حلم، ولكن حلم بثمن غالي. ومع ذلك، حب المغاربة لأسود الأطلس خلا بزاف يغامرو باش يكونو حاضرين فواحد من أكبر المواعيد الكروية فالتاريخ ديال الكرة الوطنية.