دابا المغرب كيلقاو فيه حفريات للإنسان العاقل وماقبله عمرها كيوصل حتى لسبعمية ألف سنة، وبسباب هاد الحفريات المجتمع العلمي في العالم كيزيد يفهم نظرية التطور، وحنا في المدرسة كيقريونا بداية تاريخ المغرب هي وجاء المولى إدريس هاربا من أولاد عمه بغاو يصاوبوا بيه الكفتة وبايعته قبيلة أوربة وأسس مدينة فاس، وهو غير حدا قبرو كاينة وليلي وحدة من أجمل مدن الحضارة الرومانية الأعظم في التاريخ، دابا حنا الصدفة جابتنا في بقعة جغرافية عندها تاريخ عظيم، ومع ذلك تاريخنا الرسمي مسلفينو من الشرق وبادي منذ وصول فرد من الجزيرة العربية، الله يديكم.

مادام أن العديد من الدلائل على نظرية التطور تلقات في بلادنا، فراه خاص تقرى في المدارس كحقيقة علمية، ويتدارو خرجات استكشافية للتلاميذ باش يشوفوا جدودهم كي كانوا عايشين ويفهموا تاريخ الانسان الحديث كيفاش بلادهم راها جزء مهم منو، وكذاك التاريخ السياسي والاجتماعي للبلاد ككل، آشنو كان المغرب قبل مايجي الإسلام، شكون هوما فيالقزالخيالة لي كانوا مع حنبعل ودازوا معاه جبال الألپ وهزموا معاه الرومان، شناهي الحروب لي خداوها المغاربة مع الرومان نيت على الأقل، مادام ان هاد الحضارات كاين دلائل حسية على وجودها في البلاد، راه عيب ان تاريخ المغرب يتم تلخيصه في طناشر قرن.

جزر الكناري وسط البحر وتاريخها لي عندو علاقة بالمغرب راه كيوصل حتى لألف سنة قبل الميلاد، فين وصلوا ليها الامازيغ المغاربة وسكنوها، الى كانوا غير جزر حدانا مشاو ليها جدودنا وتاريخها كيمتد لألف سنة قبل الميلاد، كيفاش حنا راه البلاد لي مشاو منها هاد الناس تاريخنا في المقررات وعند الدولة كيبدى من ألف وميتين سنة، كاين الدول معندهاش تاريخ وكتشريه وتزوروا وتنسب لراسها احداث خيالية غير باش تدير لنفسها هوية، حنا بلاد عندنا تاريخ عريق ومع ذلك ناكرينو، اما وصول المولى ادريس راه جزء بسيط من تاريخ المغرب لا غير وماشي بدايته، مادام انسان ايغود عندو تلتمية ألف سنة، يعني قبل الحضارة في مابين النهرين وقبل تعلم الكتابة وجميع الروايات الدينية، وليوم لقينا انسان آخر هو حلقة كانت مفقودة في سلم التطور، ومع ذلك المغاربة غارقين في حالة نكران وكالسين كيعتابرو تاريخهم بادي من الشرق.