كأس افريقيا خاصو يتدار في الصيف في أجواء افريقية حقيقية، وتكون الجماهير مسالية وواخدة راحتها والبلاد عامرة جالية وسياح، ماشي يتدار في في البرد والليالي بالاضافة إلى انه نتمنى نشوف هامش حرية أوسع في الفضاء العام وفي القوانين يولي بنادم قادر يهدر ويضحك ويعبر بلا مايمشي للحبس بحال بوز فلو او المالكي .

مصدر الصورة

محمد سقراط -كود///

أغلب سكان الأرض فاش كيسمعوا قارة افريقيا، كتمشي مخيلتهم للحرارة المفرطة والصحراء والسبوعة كيتساراو في الساڤانا، والزرافات والحمير الوحشية. والغابات الإستوائية، قلال بزاف لي كيتخايل افريقيا فيها الشتا والبرد ومناخ معتدل عموما، راه المغرب وكاين أجانب كيستغربوا فاش كيشوفوا فيه الثلج والبرد بحال هاد العام، وفاش كتسمع كاس افريقيا ديما كتجي في بالك الحرارة والرطوبة والگايلة الحارقة، ولكن هاد كاس افريقيا لي تدارت في المغرب هاد العام مافيها والو من هادشي، كولشي منظم كثر من القياس، الشتا خيط من السما طيلة أيام البطولة، مكاين لا احداث غرائيبة لا تسممات جماعية لا أوبئة، بحال الى منظم في أوروبا الفرق هو الطاسة والنشاط كثير في أوروبا على هنا.

كأس افريقيا خاصو يتدار في الصيف في أجواء افريقية حقيقية، وتكون الجماهير مسالية وواخدة راحتها والبلاد عامرة جالية وسياح، ماشي يتدار في في البرد والليالي في أكثر وقيتة في العام البلاد فيها خاوية كتصفر وكولشي خدام وقاري ممساليش، بالاظافة إلى انه نتمنى نشوف هامش حرية أوسع في الفضاء العام وفي القوانين، لينا بعدا كمغاربة وحتى للي غادي يجيو، يولي بنادم قادر يهدر ويضحك ويعبر بلا مايمشي للحبس بحال بوز فلو او المالكي، وتطلق الحياة في الفضاء العام مع تنظيم طبعا، حنا بلاد افريقي فيه الحرارة اغلب السنة والناس ديما خارجين برا، من المفروض يكون الشارع المغربي فيه الحياة، فيه الفن في الماكلة في الثقافة فيه الابداع فيه الطاسة، التنظيم الجيد مكيعنيش شوارع خالية بلا حياة عامرة غير بالمخزن والگرياجات.

هنا في فاس مثلا راه بحال الى مكاينش كاس افريقيا، واخا مستقبلة المدينة منتخب وفيها فان زون ولكن الجمهور قليل والبرد والشتا كثيرة راه كتقرب الحرارة للصفر بالليل، بالاظافة الى الاحداث كلها بعيدة على قلب المدينة، كذلك الرباط راه كيكمل الماتش مع الحداش المدينة كلها نعسات بنادم صابح خدام، كون فيزالصيف راه واها يتعلب الماتش مع جوج دالليل يحضر الجمهور، إلى غادي ينظم المغرب شي دورة خرى خاصها تكون في الصيف والزحام والجو زوين والدنيا عامرة وبنادم ناشط، اما دابا راه بحال الى لاعبين في التيران ديال ستوك سيتي.