هاد النشرات كاتأكد بأن بلادنا غادي تعرف فالأيام الجاية تقلُبات جوية مهمّة، من بينها طقس غير مستقر، تساقطات مطرية قوية وحتى قوية بزاف، وزخّات رعدية فبعض المناطق، وزيد عليها تساقطات ثلجية فوق المرتفعات، ورياح قوية ممكن تهم بزاف ديال الجهات.

الداخلية خرجات بيان تطلب فيه من الناس ياخدو أقصى درجات الحيطة والحذر، ويديرو جميع الاحتياطات اللازمة باش يتفاداو أي مخاطر ممكنة ناتجة على هاد التقلبات الجوية.

وفهاد الإطار، دعات الداخلية الناس ما يغامروش بقطع الطرقان اللي ممكن تغمرها المياه، ولا عبور الوديان والمناطق المنخفضة اللي ممكن تعرف سيول مفاجئة، وشددات على ضرورة تجنّب أي تصرّف غير محسوب اللي ممكن يعرّض السلامة الجسدية ديال الأشخاص، ولا سلامة الناس الآخرين والممتلكات للخطر، مع الالتزام التام بتعليمات والتوجيهات ديال السلطات العمومية وفرق التدخل المختصة.

مصدر الصورة

كما كاتوصي الوزارة بتأجيل السفر والتنقلات اللي ماشي ضرورية، خصوصاً فالمناطق اللي معنية بهاد الاضطرابات الجوية.

الداخلية أكدات باللي السلطات المحلية، بتنسيق مع مختلف المصالح والقطاعات المعنية، دارت مجموعة من التدابير الاستباقية والوقائية لمواجهة الآثار المحتملة لهاد الأحوال الجوية، خاصة من خلال تدخلات ميدانية وقائية شملت تنقية وصيانة قنوات وشبكات الصرف الصحي.

وأشارت باللي تم تنظيف مجاري المياه والنقط الحساسة، ومعالجة النقط السوداء اللي كاتتجمع فيها الما، إضافة إلى تعبئة الموارد البشرية وتسخير الوسائل اللوجستيكية الضرورية، ووضع جميع الإمكانيات اللي كاينة فحالة استعداد قصوى، باش يكون التدخل سريع ويتوفّر الدعم والمساعدة كلما دعت الضرورة، وحماية سلامة الناس وحتى والممتلكاتهم.

ودعات وزارة الداخلية من جديد الناس باش يتحلّاو بروح المسؤولية ويتعاونو بشكل إيجابي، وشددات مرة أخرى على الأهمية ديال الالتزام الصارم بالإرشادات والتوجيهات الصادرة عن السلطات المختصة، بما يساهم فالتقليل من المخاطر المحتملة وضمان سلامة الجميع.