كشف الحسين يوعابد، المسؤول على التواصل فالأرصاد الجوية، فتصريحات لـ”كود”، باللي ابتداءً من نهار الجمعة وحتى لبداية السيمانة الجاية، يُتوقع يوصل اضطراب جوي أطلسي جديد للسواحل الأطلسية ديال البلاد، بسبب اقتراب منخفض جوي قوي وفعّال، اللي غادي يرجّع الأجواء غير مستقرة فعدد من المناطق.

هاد الحالة الجوية، حسب المتحدث لـ”كود”، غادي تكون مصحوبة برياح قوية غادي تهم السواحل والسهول الأطلسية الشمالية والوسطى، ومرتفعات الأطلس، والمنطقة الشرقية، وحتى شمال الأقاليم الصحراوية.

كما توقعات المديرية بللي غادي تكون الشتا او زخات ديال الشتا تقدر تكون رعدية فبعض الأحيان، فعدة مناطق من البلاد، خصوصا فسوس، والسواحل والسهول الأطلسية الوسطى، مع شتا متفرقة غادي تكون فوسط البلاد ومحليًا فالسهول الأطلسية الشمالية وبعض الأقاليم الجنوبية.

كما كيتوقع، حسب يوعابد لـ”كود”، طيح الثلوج فوق مرتفعات الأطلس الكبير، وفنفس الوقت غادي تعرف درجات الحرارة ارتفاع نسبي فالشمال الغربي، وشمال المنطقة الشرقية، وسايس، والأطلس المتوسط، مقابل انخفاض ولا استقرار نسبي فباقي المناطق.

وخلال الفترة بين السبت حتى الاثنين الجاي، غادي يسود طقس مضطرب، مع الشتا او زخات رعدية فبعض الأحيان فالنصف الشمالي ديال البلاد وشمال الأقاليم الجنوبية، وزيد عليها أجواء باردة نسبيًا فوق الأطلس، والجنوب الشرقي، والمنطقة الشرقية.

وتوقعات المديرية باش تكون الرياح قوية نسبيًا حتى قوية فالسواحل والسهول الأطلسية الشمالية والوسطى، والأطلس، والشرق، والجنوب الشرقي، وجنوب البلاد، مع تساقط الثلوج فمرتفعات الأطلس، والريف، وجنوب المنطقة الشرقية، وانخفاض ملحوظ فدرجات الحرارة فالنهار.

وغادي تستمر هاد الحالة الجوية المضطربة حتى لبداية الأسبوع اللي من بعد، بحيث كيتوقع يومي الثلاثاء والأربعاء تبقى الأجواء متقلبة وغير مستقرة فالنصف الشمالي ديال البلاد، قبل ما تبدا الأجواء تدريجيًا فـالاستقرار ابتداءً من نهار الخميس، مع تسجيل ارتفاع تدريجي فدرجات الحرارة ورجوع الأجواء المعتدلة شوية.