احتفالات البوناني ففاس.. الأجواء داخل لمدينة دازت عادية بلا حوادث و"ثمرة" دارت استنفار كبير فواحد لوطيل .

مصدر الصورة

كود – فاس///

الاحتفالات ديال نهاية راس العام ففاس دازت فأجواء عادية وزوينة. المجهودات الأمنية اللي دارتها ولاية أمن فاس بتنسيق مع مصالح المديرية الجهوية لمراقبة التراب الوطني كانت بشكل استباقي، ولم تسجل حتى شي أحداث خطيرة.

محمد بولحباش، رئيس القيادة العليا للهيئات الحضرية بولاية أمن فاس، أكد فتصريحات صحفية باللي ولاية أمن فاس جندات جميع الوحدات ديالها من أجل تأمين جميع النقط بمداخل ومخارج العاصمة العلمية.

كما أبرز أن مصالح الأمن ضمنات انسيابية حركة السير وتأمين المطاعم ولوطيلات، مؤكدا أنه لم تسجل أي أحداث عنيفة أو حوادث سير باستثناء تدخلات أمنية كانت عادية بحال ديما، وحركة السير بدات تنقص فحدود الساعة الواحدة صباحا.

وقريبا من فاس شويا، وقع قبل نهاية رأس السنة حادث خلق حالة استنفار كبيرة داخل واحد لوطيل، وقد كشفت مصادر مطلعة لـ”كود” أن شي مسؤول كبير مشا مع شي صحابو وعائلتو لهاد لوطيل، ومني مشا يتعشى كلا شي “ثمرة” قاليك خايبة.

وحسب المصادر ديال “كود”، فإن هاد المسؤول بغا يبان حدا صحابو وعائلتو، وناض كيعيط لعدد من المسؤولين فالهاتف باش يصيفطو ليه شي لجنة لهاد لوطيل اللي كيجيو ليه عدد من المشاهير، ويحظى بعناية ملكية.

ووفق المصادر نفسها، فإن الاتصالات اللي دار هاد المسؤول نوضات استنفار كبير، لكن تبيّن من بعد أنه مكاين حتى شي حاجة من داكشي اللي ادعى، فقط السيد كان فحالة ماشي هي هاديك، مشيرة إلى أن هاد المسؤول خلصات عليه شركة ديال الأسفار اللي مولها رجل سياسي معروف ففاس.

إدارة لوطيل طبعا عندها ما يتبث هادشي. فيديوهات، ووثائق وغيرها. كتقول مصادر “كود” اللي شبعات ضحك على حادث “الثمرة”.