عثمان الشرقي – كود//

عرفات مدينة الراشيدية هاد اليوماين تطور جديد فالقضية ديال مقتل الولد السارح محمد بويسلخن، من بعد ما سالات الݣلسة د الاستماع لوالدي الضحية، وهادشي جا من بعد ما تقبل الطلب ديالهم باش يكونو كطرف مدني فالقضية.

هاد التطور جا حيت الجمعية المغربية لحقوق الإنسان تكفلات بالمصاريف القضائية عوض أسرة الضحية، حسب ما قالت مصادر حقوقية.

وبنفس المصادر، هيئة التحقيق غادي تستمع للشهود اللي تعيّطو ليهم، والجلسات الجاية غادي تكمل فالمسار ديالها باش يتفك لغز هاد الجريمة اللي توصفات بـ”الغبية”.

نفس المصادر أكدو أن الملف كان قريب يتسدّ بحجة “رواية الانتحار”، غير أن التدخل الحقوقي هو اللي منع هادشي.

ومن جهتهم، لجنة الحقيقة والمساءلة قالت باللي غادي تبقى متبعة الملف وتساند الأسرة ديال الضحية حتى يتحقق العدل ويتكشفو ملابسات الجريمة ويتعاقبو المتورطين.