رد الفنان أحمد العوضى على حالة الجدل التى أثيرت خلال الأيام الماضية، عقب تداول تصريحات له من إحدى حلقاته التليفزيونية، مؤكدًا أن ما نُسب إليه من تشبيهات أو إساءات للمرأة «عارٍ تمامًا عن الصحة»، مشددًا على أنه لم يتعرض لأى شخص أو امرأة بأى إساءة، وأن بعض تصريحاته جرى اقتطاعها من سياق حديث امتد لنحو ساعة و38 دقيقة.

وقال أحمد العوضى: «كل التشبيهات اللى اتقالت عارية تمامًا عن الصحة، أنا قلت إن كل مرحلة لها ذكرياتها الخاصة، وبقول مرحلة، ودى تشمل سكن أو شغل، أو ارتباط عاطفي، لو سيارة، وكتبت بوست اعتذار لما لقيت إنه ممكن يروح يمس أشخاص أقدرهم وأحترمهم، فنزلت اعتذار عن لو كان الكلام اتفهم غلط، لكن أنا أصلًا مقولتش حاجة».

وأضاف: «بالمناسبة الحلقة دى ساعة و38 دقيقة، قلت فيها كلام كتير جدًا، وكنت حريص فى كل كلمة وعارف أنا بقول إيه، علشان محدش يدخل فى نيتى، وغلطوا فيا فى كلام مش حقيقي».

وتابع العوضى: «قالوا أنت طلعت عدو المرأة، وبتشتم المرأة، وبتبص للمرأة نظرة مهينة، لكن أنت ما شوفتش الحلقة اللى هى ساعة و38 دقيقة. أنا قلت الست لازم تتعامل برنسيسة».

وأوضح: «قالوا أنت عاوز ست ضعيفة، وأنا مقولتش كده، أنا قلت إن الراجل بيضعف قدام دموع المرأة، وإن جمال المرأة فى ضعفها فى الحب، ماقولتش إن الست تبقى ضعيفة».

وأشار إلى أنه تحدث خلال الحلقة عن ضرورة الاهتمام بالأسرة والأبناء، قائلًا: «قلت البنت لازم تتدلع فى بيت أبوها، وقلت مينفعش الزوج والزوجة يتخانقوا قدام الأولاد».

وعن الجدل الذى صاحب تصريحاته، قال العوضى: «قالوا لازم تعتذر لكل الستات، لكن أنا مغلطش فى حد، أنا اعتذرت عن الفهم الخاطئ، سواء لشخص بعينه أو النساء عمومًا، أنا متكلمتش فى كلام يهين المرأة أساسًا فى الحلقة كلها، بالعكس».

وأكد: «أنا لم أتعرض لأى شخص ولا لأى ست عمومًا بأى كلمة أو حتى نية داخلية مسيئة، لأن الست فى الآخر أختى وبنت خالتى وأمي».

وتحدث العوضى عن والدته، موضحًا: «مقدرش أنظر للست نظرة دونية، لأن فى الآخر اللى ولدتنى ست، وأمى الله يرحمها توفت، أكيد أنا مش هغلط فى أمى. أى حد بيتكلم بتحضر أمه فى دماغه، وأكيد أنا مش هتكلم عن أمى بالطريقة الغلط دي».

وأضاف: «أنا مش بالغباء ولا بالسذاجة إنى أطلع أشبه التشبيه الدنيء والوضيع ده، لأننا فى الآخر عندى خالتى وعمتى، وبنت خالتى وبنت عمتى، وأكيد مش هغلط الغلط ده، لكن اللى عايز يتصيد هيتصيد».

وعن التصريحات التى أثارت الجدل، أوضح العوضى أن المذيع سأله خلال الحلقة: «هل ممكن الذكريات الجديدة تنسيك الذكريات القديمة؟».

وقال: «ورديت عليه وقلت له هقولك على حاجة: كل مرحلة فى الدنيا لها ذكرياتها الخاصة، والمرحلة دى تشمل حياتك، ولو حد فى حياتك، عربيتك، وشغلك. وسعت المعنى وقلت وضربت مثال بالعربية واتكلمت بشكل تلقائي».

وتابع موضحًا: «قلت له لما ركبت لانسر كنت سعيد سعادة غامرة، ولما ركبت المرسيدس عملت كده، وقلت إن أبويا كان عنده 132 وكنت بركبها منه، فلو أنا قاصد، أو أنا رايح لتلميح، أو أنا أقصد المعنى السيئ ده، أكيد مش هجيب سيرة أبويا».

واستكمل: «وده معناه إنى كنت بتكلم فعلًا على العربية، وقلت حتى بعدها إن أنا بعد المرسيدس جبت مرسيدس، بس الكلام اتجزأ، وخرج للناس إنه بين عربية وعربية والكلام الفاضى ده».

وشدد أحمد العوضى فى ختام حديثه على أن تصريحاته جاءت فى سياق حديث طويل تناول خلاله مراحل مختلفة من حياته وذكرياته، مؤكدًا أن اجتزاء بعض العبارات من سياقها أدى إلى تفسيرها بصورة مختلفة عن المعنى الذى قصده خلال الحلقة.