كود – ميدلت//

ضربات المحكمة الابتدائية فمدينة ميدلت البارح الخميس لحو المربوح القيادي فحزب الحركة الشعبية ورئيس جماعة ملعب لي كاينة فإقليم الرشيدية، بـ8 شهور ديال الحبس نافذة.

هاد الحكم جا بسباب القضية اللي رونات الرأي العام، والمعروفة بملف “فندق ميدلت” اللي ماتت فيه واحد الشابة فظروف غامضة.

القصة كترجع لشهر شتنبر اللي فات، بعد ما تهزات شابة فحالة صحية خطيرة ومستعجلة من لوطيل للمستشفى الإقليمي، ولكن ماتت قبل ما توصل.

التحقيقات اللي دارها الدرك الملكي كشفات بلي البنت كانت ديك الساعة مع رئيس الجماعة ف نفس الشامبر، ومن بعد التحقيق التمهيدي، وكيل الملك قرر يتابع رئيس الجماعة فحالة اعتقال وصيفطو لحبس ميدلت بتهمة “الامتناع العمدي عن تقديم المساعدة لشخص فخطر” والفساد.