كود – أگادير//

خرجات المديرية العامة للأرصاد الجوية اليوم الأحد 4 أكتوبر 2026 بنشرة إنذارية ليمونية، وحذّرات من أجواء سخونة فعدد من مناطق المملكة، مقابل زخات رعدية قوية محلياً، ممكن تكون مرفوقة بالتبروري وموجات ديال الريح مجهدة.

وبحسب النشرة، غادي توصل درجات الحرارة ما بين 36 و40 درجة فكل من كلميم، طانطان، تارودانت، السمارة، أكادير إداوتنان، اشتوكة آيت باها، إنزكان آيت ملول، تزنيت، العيون، بوجدور، وادي الذهب وأوسرد.

هاد السخونية غادي تكون مسجلة نهار داليوم الأحد، فيما كتتوقع الأرصاد الجوية، فجهة أخرى، رعدة مجهدة محليا، بمقاييس ما بين 25 و35 ملم، وغادي تشمل هاد التقلبات الجوية أقاليم وادي الذهب وبوجدور وأوسرد، من 12 ديال النهار حتى لـ11 ديال الليل اليوم الأحد.

الأرصاد الجوية دعات المواطنين ياخدو الاحتياطات اللازمة، خصوصاً فالمناطق اللي غادي تعرف الرعدة والريح.