كود ـ كازا//

4 ديال الأحزاب عندها تمثيلية محدودة فالبرلمان قررات تجمع الشمل وتشكل مجموعة نيابية مشتركة وسط مجلس النواب.

المجموعة كتضم جبهة القوى الديمقراطية، وحزب الإنصاف، وحزب الديمقراطيين الجدد، وحزب الوحدة والديمقراطية، فخطوة الهدف منها تقوية الحضور ديال هاد الأحزاب وسط المؤسسة التشريعية فالولاية البرلمانية الجديدة.

القرار جا من بعد مشاورات بين قيادات الأحزاب، ولي سالات بالاتفاق على خلق إطار برلماني مشترك، خصوصاً من بعد نتائج الانتخابات التشريعية الأخيرة.

مصدر الصورة

فبلاغ مشترك، قالت الأحزاب الربعة بلي المبادرة جاية من الإيمان بالدور الدستوري والوطني ديال البرلمان، وبأن العمل النيابي خاصو يخرج من منطق الحسابات والأرقام التقليدية، ويمشي لممارسة برلمانية فعالة.

الهدف، حسب البلاغ، هو تقديم مبادرات تشريعية ورقابية واقتراحية كتساهم فمعالجة الملفات الاجتماعية والدفاع على كرامة المواطنين، مع تقوية آليات تقييم السياسات العمومية وتحويل انتظارات المجتمع لمقترحات وبرامج قابلة للتنفيذ.

أما من ناحية الأرقام، فهاد التكتل كيتوفر على 6 مقاعد فمجلس النواب: جوج مقاعد لجبهة القوى الديمقراطية، جوج لحزب الإنصاف، ومقعد واحد لكل من حزب الديمقراطيين الجدد وحزب الوحدة والديمقراطية، حسب النتائج النهائية ديال انتخابات 23 شتنبر 2026.