كود طنجة ////

القضية ديال الخروقات الانتخابية في طنجة زايدة وكتزند، ومن بعد ما هبطو عمدة طنجة البامي منير الليموري هو ولي معاه، جا الدور دبا على المستشار الجماعي بمقاطعة السواني رضوان الزين اللي تمنع من مغادرة التراب الوطني، في انتظار استكمال الأبحاث الجارية في القضية.

التسجيل الصوتي اللي كان تسرب يوم الانتخابات بطنجة، ولي كلشي طنجاوة كانوا عرفوا الصوت للي فيه ديالمن من غير مولاه وشي وحدين فالسلطة، راه دبا في يد الخبرة التقنية.. طبعا هادشي جا من بعد جلسة الاستماع التمهيدي إلى رضوان الزين اللي جرات بمقر ولاية أمن طنجة، والي سالات باتخاذ النيابة العامة إجراء احترازي بمنعو من مغادرة التراب الوطني، في وقت مازال فيه البحث مفتوح.

البحث طبعا كيتعلق بتسجيل صوتي جرى تداوله على نطاق واسع تزامنا مع يوم الاقتراع، وفيه كلام عن تصوير الناخبين بما يسمح بالتأكد من اختيارهم الانتخابي، إلى جانب إشارات إلى مقابل مالي مرتبط بهذه العملية.

رضوان الزين مني استمعوا له نكر يكون الصوت اللي في التسجيل ديالو، كيفما نكر أي علاقة له بالمقطع الصوتي المتداول.

وبسبب هذا الإنكار، قررات النيابة العامة بمحكمة الاستئناف بطنجة إخضاع التسجيل الصوتي للخبرة التقنية، وحالتو على المختبر الوطني للشرطة العلمية والتقنية، باش دير له الفحوص اللازمة وتتحقق من مطابقة الصوت اللي فيه لصوت رضوان الزين.

وكان التسجيل اللي انتشر بشكل واسع عبر مواقع التواصل الاجتماعي وتطبيقات التراسل الفوري، وظهر مرفوق بفيديو لشخص كيدير علامة «×» على رمز السنبلة، وهو الرمز الانتخابي لحزب الحركة الشعبية اللي ترشح باسمه محمد الزموري في دائرة طنجة-أصيلة، اللي بان أنه كان مدعوم من سياسي من حزب آخر وهذه قصة أخرى.

التسجيل كان فيه صوت شخص كيقول فيه: “باش نعرفو شكون اللي صوت.. هادو الدراري دالسواني كيصوروا وكيصيفطو ليا.. خاصو غير يكون قافز وبالسكات يصور وجهو”، قبل أن يضيف: “اللي جاب تصويرة بوجهو بهادي أنا موجود.. أنا كنتسناك.. الله يجعلك تجيب حتى ألف”.

هاذ التسجيل رجع للواجهة مؤخرا، بعدما علن المحامي عمر بنعجيبة، وكيل لائحة تحالف اليسار بدائرة طنجة-أصيلة، أن الفيديو غادي يكون موضوع طعن في لائحة الزموري ديال الحركة الشعبية واللي عندو الجنسية الاسبانية، وأضاف بخصوص التسريب: “اللي عمل الذنب يستاهل العقوبة”.