كود -سلا //

صيقط سيدنا جوج بريات لملك سلمان بن عبد العزيز آل سعود، عاهل المملكة العربية السعودية، والأمير محمد بن سلمان بن عبد العزيز آل سعود، ولي العهد ورئيس مجلس الوزراء، على قبل الاعتداءات اللي كتتعرض ليها المملكة العربية السعودية من طرف الميليشيات الحوثية الإرهابية.

وأكد سيدنا فهاد البريات أن روابط الدين والتاريخ والمصير المشترك، والعلاقة الأخوية القوية اللي كاتجمعو شخصياً وعائلتو بالشعب السعودي والأسرة الحاكمة، كتفرض الوقوف مع السعودية فهاد الظرف.

وقال الملك بلي المسؤولية التاريخية والقيم الدينية والاعتبارات الاستراتيجية كتفرض على كلشي يكون فصف واحد للدفاع على الحق والسيادة والأمن ومقدسات الأمة.

وعبّر الملك على القلق الكبير والانشغال ديالو بسبب الاعتداءات المتكررة اللي كتتعرض ليها السعودية، واللي كتشنها الميليشيات الحوثية على المنشآت المدنية والاقتصادية والتجهيزات الحيوية، عاد استهداف المدن والمناطق السكنية اللي كيسكنو فيها المدنيين زيد عليها مكة المكرمة والمدينة المنورة.

وأكد سيدنا أن هاد الهجمات لي كتقيس امن واستقرار ورفاهية الشعب السعودي، ماشي غير اعتداء على السعودية وشعبها وعلى المعتمرين الموجودين فيها، ولكن حتى اعتداء على مشاعر كثر من مليار و800 مليون مسلم فالعالم.

كيف ما قال سيدنا انه باسمو وباسم الشعب المغربي كلشي كييدين هاد الأعمال، وكيحمل الميليشيات الحوثية الإرهابية، والجهات اللي كتوقف وراها وكتدعمها بالتمويل والتسليح، المسؤولية الكاملة عنها.

وجدد الملك التأكيد على أن المغرب غادي يبقى دايماً واقف جنب السعودية فمواجهة المخاطر اللي كتتهددها، بسبب الميليشيات الإرهابية والانفصالية والجهات الإقليمية اللي كتدعمها، واللي كتستهدف أمن الدول المجاورة ومجالها الإقليمي.