اليوم وزير الداخلية عبد الوافي لفتيت صيطف لجنة مركزية باش تبحث فقضية فضيحة مدرستي “القدس” و”عباس التازي” فالسواني بطنجة. خدمة هاد اللجنة ما كتعارضش مع التحقيق اللي فاتحو الوكيل العام.

اللجنة اللي رسلاتها الداخلية عندها طابع اداري. يشوفو شكون من رجالات السلطة متورط فهاد القضية ديال ادخال صيكان ديال الاوراق فيهم علامة “التراكتور” وتحطو بعضهم فشي صنادق فدوك المدرستين نهار 23 شتنبر اللي فات.

اتهام اعوان سلطة خاصو يمشي بعيد. المسؤول الاول عليهم هو الوالي يونس التازي. هاد الوالي الفاشل اللي كان فتطوان وكانت عملية الحريك الجماعي لسبتة ف2021 وولى والى بدعم من صديقو وزير الداخلية عبد الوافي لفتيت ووقعات فضيحة اكبر هي الحريك الجماعي لسبتة يومي 30 و31 يوليوز اللي فات اي نهار عيد العرش. اليوم فضيحة اخرى تسجل فمسار هاد الوالي وهي اوراق انتخابية كدار فصندوق باسم حزب التراكتور.

المتورط فيها لحد الان فانتظار تحقيقات القضاء ومن بعد المحاكمة جنائيا، 5 الاشخاص بالاضافة الى عمدة طنجة منير الليموري اللي هرب من المغرب عبر سبتة. غير خروجو من سبتة خاصو يتحاكم عليه بعدا. المسؤولون والمنتخبون كلهم مطلوب منهم ما يمشيوش من باب سبتة.

دابا لفتيت خاصو يبدا تحقيقو من الفوق ماشي من التحت. عمدة طنجة راه كان خادم مطيع للوالي يونس التازي. والي فاشل ضعيف جا بعد جوج ولاة مزيانين: محمد امهيدية ومحمد اليعقوبي.

الانتخابات فالمغرب كانت مزيانة ونزيهة كيف قال لفتيت فالاعلان على النتائج، لكن فضيحة طنجة شوهاتها. شوهاتها وطنيا ودوليا. عليها الموضوع خدا اهتمام كبير وسيدنا متبعو وباعي القانون يطبق فهاد الحالة.

جميع ولاة الجهات دارو خدمة مزيانة. 11 والي جهة والداخلية ووزيرها تلقاو، على العموم، اشادات، الا هاداك ديال جهة طنجة اللي خاصو يتوقف على العمل اولا ويتم فتح تحقيق معاه. ما يمكنش جوج ولاة وقفوهم على الخدمة بسباب حولي كيف وقف ففاس ومراكش وهادا شوه بلاد ما يتوقفش. دابا ماشي متهم. غير يتوقف حتى يسالي التحقيق. ايلى كان عندو دور راه ما غادي حتى حد فالسلطات يقدر يهدر عليه. العدل هو يرجع للرباك ويتكلف شي شخص اخر بالمهمة حتى يسالي التحقيق