كازا.. ولاية جهة الدار البيضاء-سطات كتستعد باش تعلن على نتائج اللائحة الجهوية.. 23 لائحة كتنافس على 12 مقعد .

مصدر الصورة

أميمة عطية – كود كازا ///

كتستعد ولاية جهة الدار البيضاء-سطات، فهاد الأثناء وهاد لعشية نهار الأربعاء 23 شتنبر 2026، باش تعلن عن النتائج المؤقتة ديال الدائرة الانتخابية الجهوية، وسط ترقب كبير من طرف ممثلي الأحزاب ووسائل الإعلام اللي حاضرة لتغطية نتائج الانتخابات التشريعية.

وحسب المعطيات المتوفرة، كتتنافس فهاد الدائرة الجهوية 23 لائحة على 12 مقعد مخصصين لجهة الدار البيضاء-سطات، وهي المقاعد اللي غادي تحدد شكون غادي يمثل الجهة فالولاية التشريعية المقبلة.

ومن بين أبرز الأسماء اللي دخلات هاد السباق، كاينة نبيلة الرميلي، وكيلة اللائحة الجهوية ديال التجمع الوطني للأحرار، ومليكة مزور عن الأصالة والمعاصرة، وفاطمة وشاي عن العدالة والتنمية، و نبيلة جلال عن تحالف اليسار، وسناء البداوي عن الاتحاد الاشتراكي، وسلمى العلمي عن حزب الاستقلال، ودليلة الأوديي عن التقدم والاشتراكية، وأمينة السالك عن الحركة الشعبية.

والدائرة الجهوية ديال الدار البيضاء-سطات كتعرف أهمية خاصة، بحكم أنها كتضم 12 مقعد جهوي، و 57 مقعد مخصص للدوائر المحلية بالجهة، وهادشي كيرفع مجموع المقاعد المرتبطة ترابيا بالجهة ب 69 مقعدا.

ودابا، الأنظار متجهة لمقر الولاية فانتظار بداية الإعلان عن النتائج المؤقتة، بعدما سالات عملية التصويت مع سبعة لعشية.

وبمجرد الإعلان عن النتائج، غادي يتحدد عدد المقاعد اللي حصلات عليها كل لائحة، ومن بعد الأسماء اللي غادي تدخل لمجلس النواب حسب المقاعد اللي حصلات عليها كل لائحة وترتيب مرشحاتها.

“كود” حاضرة من مقر ولاية جهة الدار البيضاء-سطات لمواكبة لحظة إعلان النتائج وتفاصيلها.