سباتة.. من بعد ما دارتها مع مرشحي الحمامة فكازا جا الدور على راجلها توفيق كميل.. العمدة هبطات معاه للزنقة تعاون وتساندو فجمع أصوات بن مسيك وسط الزغاريت والتصفيق.. الرميلي ل “كود” : خرجت مع مرشحين الحزب ماشي حيت ماعندهومش الشعبية ولكن حيت هادا واجبي كوكيلة جهوية للحزب .

أميمة عطية – كود كازا ///
مصدر الصورة
بارك سباتة فكازا مع الستة ديال العشية، بدا كيعمر شوية بشوية، رجال وعيالات، كبار وصغار، مناصرين لحزب التجمع الوطني للأحرار، كيتجمعو وكل واحد فيهم كيتسنا توصل نبيلة الرميلي، عمدة كازا ووكيلة اللائحة الجهوية ديال الأحرار بجهة الدار البيضاء سطات، ومعاها وكيل اللائحة المحلية فبن مسيك سباتة، توفيق كميل وباقي مرشحين الحمامة للمنطقة.
مصدر الصورة
كلشي كيراقب من بعيد كلشي حاضي وكلشي باغي يبان بصورة زوينة مكتحشمش قدامها ، الأبيض والزرق بداو كيبانو فجردة، والحمامة حاضرة فلكاسكيطات و فجيليات وحتى وفللافتات، لوارق بداو كيتفرقو لناس لي جاو باش يشاركو فالحملة الانتخابية، وصفوفا كيتقادو .
مصدر الصورة
طوموبيلا وصلات لداخل ديالها كاينة نبيلة الرميلي ومعاها توفيق كميل، غير نزلات وهي تنوض لهيلالة، التصفيق بدا من جهة، وزغاريت من جهة أخرى، رجال كيغوتو، لا لحم لا برقوق ونبيلة فصندوق وتوفيق فصندوق والعيالات كيزغرتو بصلاة وسلام ، وكل واحد فيهم باغي يقرب ويسلم ولا يدير تصويرة معاهم .

“ كود” دارت دويرة مع الرملي لي هبطات وسط الناس بهدوء، كتسلم على هادي وكتضحك مع هادا ، كتوقف مع لمواطنات ولمواطنين وكل واحد كيشكي بهمو وكيسول لي بغا وهي كتجاوب كيف لعادة برزانة وكتسول واش ناس مسجلين في اللاوائح او لا لا .
مصدر الصورة
وحنا كنتمشاو معاها فالجولة، لي دارتها فهاد جريدة هي ورفيق دربها توفيق كميل المرشح فبن مسيك، لاحظنا كيفاش هاد لمنطقة مولفة عليهم كيفاش ناس كيبغيوهم وكيفاش الحملة الانتخابية كتدوز فالزنقة مع ناس شعبيين لبسطاء .
مصدر الصورة
وفهاد السياق ، ناس كانو عندها ملاحظات وانتقادات ، وسط هاد التواصل، بحيت شي عيالات وشابات بنات سباتة قالو للرميلي بصراحة إن الثقة فالأحزاب ما بقاتش كيف كانت، وإن الوعود الانتخابية بزاف منها كيتعاود مع كل انتخابات.

الرميلي، الهادئة والرزينة وسط زوبعات، خلاتهم يكملو هضرتهم قبل ما تجاوب، وردات عليهم بالحصيلة ديال الحكومة للي وصلات للمدن والجماعات في دعم التدبير المحلي كالت ليهم إن الوعود اللي تعطات لكازا تخدم منها بزاف، وباقي ملفات أخرى باش يحققو أكثر.

وطلبات منهم اشوفو كيف ولات كازا من بعد خمسنين ويصوتو على الحمامة باش “تطير” وتزيد تعلى وتوصل الصوت ديالهم للبرلمان.

“ كود” استغلات الفرصة وسط هاد الصداع وناس بزاف وسولنا لعمدة الرميلي مباشرة على : واش كتخرج مع المرشحين ديال الأحرار حيت عندها حضور وشعبية ممكن تعاونهم ايجيبو الأصوات، ولا حيت هي وكيلة اللائحة الجهوية وعندها مسؤولية حزبية كتفرض علها تكون حاضرة معاهم؟

الرميلي جاوبات “ كود” ، بأن حضورها مع المرشحين داخل فالمسؤولية ديالها كوكيلة للائحة الجهوية، وأنها كتعتبر أن من واجبها تعاون الحزب وأعضاء الحزب فالانتخابات.

وإلا جينا نشوفو ، رميلي سبق ليها خرجات فالحملة مع عدد من مرشحي الأحرار فمناطق مختلفة، من بينهم مرشحو الدوائر المحلية، بحال ، أمين النقطى وكيل اللائحة المحلية مديونة عبد الرحيم وطاس وكيل اللائحة المحلية سيدي البرنوصي ، محمد الشباك وكيل اللائحة المحلية أنفا ادريس الشرايبي وكيل اللائحة المحلية الحي الحسني.

واليوم جا الدور على توفيق كميل، راجلها ووكيل اللائحة المحلية ديال الحزب فبن مسيك، باش تكون معاه فهاد الجولة الانتخابية وتساندو باش ناس اصوتو عليه .

الأحرار نازلين للحملة بكل ثقلهم فهاد الأيام الأخيرة قبل 23 شتنبر، والرميلي كتخرج مع المرشحين، كتسلم على الناس وكتحاول تسمع ليهم، وتوفيق كميل كيدور فالدائرة ديالو.

وبين الزغاريت ديال العيالات، والغوات ديال الرجال، والتصفيق اللي كان كيرجع كل مرة ملي كتوصل الرميلي عند شي مجموعة، عاشت سباتة من لعشيا حتى الليل اجواء فيها أمل ديال التغيير ومواطنين باغين يسمعو شنو غادي يتبدل فحياتهم قبل ما يختارو شكون غادي يعطيه صوتو نهار 23 شتنبر.