عبد الهادي خيرات، القيادي السابق في الاتحاد الاشتراكي للقوات الشعبية ، واللي دابا مرشح فالانتخابات البرلمانية باسم حزب التقدم والاشتراكية “الكتاب”، خرج بتصريح خاص لجريدة “كود” هاجم فيه الاتحاد الاشتراكي بطريقة غير مسبوقة .

وفي هذا السياق قال خيرات: أنا كنتأسف عن ما ال اليه حزب الوردة ووزاد تحدى الجميع وقال “إلا لقيتي شي أثر ديال الاتحاد الاشتراكي هنا فسطات قولها ليا” ، وان غيب على الساحة السياسية بالمدينة ، كلام كيأكد بلي السيد كيشوف بلي الحزب اللي دوز فيه سنين انتهى وما بقى عندو حتى وجود فالمدينة.

وكمل بنفس النبرة ،او اضاف بأن المناضلين القدامى ديال الاتحاد فسطات يا إما ركنو وقلسو فديورهم وما بقاوش خدامين، يا إما هربو ومشاو فحالهم، والدليل على كلامو على حسابو هو أن مرشح حزب الوردة الأخير ديال الاتحاد ما قدرش حتى يدير الحملة ديالو فمدينة سطات ، مضيفا انه لقي ترحاب فالبيت ديال حزب التقدم والاشتراكية او عمرو ما حس بيه فشي حزب آخر، وأن العلاقة الرفاقية مبنية على أساس صحيح ، وزاد قال بلي الحزب ديال الكتاب ولا حاضر فجميع الجماعات القروية ديال إقليم سطات، غير بديور ديال المناضلين اللي تحولات لمقرات، كل واحد حل دارو ودارها مقر باش يتواصل مع المواطنين.

وبخصوص الدعم ديال الحملة الانتخابية، وضح خيرات بلي كاين الدعم ديال الإدارة المركزية والتسبيق ديال الدولة والدعم ديال المطبوعات واللوجيستيك، وزيد عليه الدعم المحلي، وقال حنا ما كنحسوش بالنقص، الخدمة دايرة بشكل متآزر وعمل منظم، والسيارات اللي خدامين بيها ديال المناضلين وكاين اللي كارينها، والماكلة والهواتف ووسائل الاشتغال كلشي كاين.

تصريحات خيرات كتجي فسياق الحراك الانتخابي اللي كتعيشو سطات قبل انتخابات 23 شتنبر، وكتبان محاولة واضحة لتبرير الرحيل ديالو من الاتحاد الاشتراكي اللي كيقول عليه ما بقاش، والالتحاق بحزب الكتاب.