بيان حزب الاصالة والمعاصرة اليوم ردا على ما جا فكلمة رشيد الطالبي العلمي البارح لثلاث 25 غشت 2026 فالمكتب السياسي لحزبو التجمع الوطني للاحرار، دون دون المستوى وضعيف شكلا ومضمونا.

فالشكل مكتوب بارتباك بحال حالة الحزب قبل ما يلتاحق بيه الجوكير فوزي لقجع، فالمضمون بان باللي قيادة الحزب اللي دارو كلشي ما كيهمهم الا ريوسهم. نهار خرجات معطيات صحيحة على تضارب المصالح ديال المنسقة الوطنية للقيادة الثلاثية بنت الباشا فاطمة الزهراء المنصوري، بينها كوارثة لهكتارات وبين تصميم التهيئة اللي دارتها هي كعمدة لمراكش وهاد الشي موثق. ناض الحزب كولو كيدافع عليها ويتضامن معاها

البارح فكلمة الطالبي العلمي اللي كان هجومو عنيف على فوزي لقجع. هجم على الحزب. رد صحاب التراكتور انشاء وصافي. قال ليك اللي قالو غير مغالطات وادعاءات باطلة بخصوص الاستمالة والضغط على المنتخبين. بيان الاحرار جبد اسماء منها ولد شباعتو اللي معروف عليه برا كاصي وللي كان عضو المكتب السياسي تحط فيه فالاحرار ترضية لبوه.

ديك الهدرة ديال نفي الاكراه وانتهاج اسلوب الحوار والاقناع والابتعاد عن الابتزاز والضغط مقبولة من اي حزب الا البام او الوافد الجديد كيف وصفو واحد النهار الكاتب الاول لحزب الاتحاد الاشتراكي ادريس لشكر. ما عمر شي حزب تعاير وتسب وتهاجم وتنعت بنعوت خايبة بحال البام. رجعو يا قيادة البام غير الذكية لتصريحات بنكيران السابقة والآنية ولحميد شباط ووووو

ما علينا اللي جا فبيانهم على تخليق الحياة السياسية ما شادش. لفضيحة لكبيرة هو عدم دفاعهم على الشخصية اللي رجعات فيهم الروح. البام اليوم بلا فوزي ما يجيبش 50 مقعد. هاد الدينامية كلها خلقها فوزي لقجع وعلى الاقل غير دافعو عليه. حتى هادي فشلتو فيه.

الفرق بين فوزي وبين هاديك القيادة هو انو نجح فالميزانية فالكورة. ما دعمو حد. وصل المدرسة المغربية اللي تسلق المناصب ووصل فين وصل بجدارة واستحقاق. كيعرف يتكلم بسلاسة ويقنع ماشي بحال مولات “تحال بلا مايو”. شوفو غير الاسلوب. فوزي هارب عليهم وما يستحقوهش