تبدلات خريطة "الحريگ" لأوروبا: الجزايريين اللولين موراهم السودانيين وتراجع كبير للسوريين .

مصدر الصورة

كود الرباط//

خرجات وكالة الحراس والحدود ديال أوروبا “فرونتكس” أحدث الأرقام ديالها، من يناير حتى ليونيو 2026، كاتبين باللي الطريق ديال الهجرة السرية فاتجاه أوروبا تبدلات بزاف.

المعطيات بيّنات باللي ولاد شمال افريقيا والعرب هما اللي فالمراتب الأولى، وكل جنسية عندها الطريق ديالها اللي كاتسلك، فالوقت اللي غابو فيه السوريين تقريباً من المشهد.

فأول اللائحة، كيجيو الدزايريين هما الأولين عربياً، بـأكثر من 4000 واحد حصلوه كيحاول يدخل فستة شهور الأولى ديال هاد العام. وحسب فرونتكس، أغلب الدزايريين كيحركو من البحر الأبيض المتوسط الغربي باش يوصلو للشواطئ ديال إسبانيا. موراهم نيشان كيجيو السودانيين فالمرتبة الثانية، والسبب باين هو الصداع والحرب اللي باقا شاعلة فبلادهم، واعتماَدهم على الشبكات ديال الحراكة فليبيا، شي اللي خلاهم يتقسمو بين الطريق ديال إيطاليا والطريق ديال اليونان.
أما المغاربة والمصريين، فحصلو عندهم كثر من 2000 محاولة لكل دولة. ولكن كل واحد والطريق ديالو؛ المصريين كيبانو بزاف فطريق البلقان، بينما المغاربة الحضور ديالهم باين كثر فالطريق الأطلسية الصعيبة اللي كادي لجزر الكناري، انطلاقاً من السواحل الجنوبية ديال المغرب والمناطق ديال غرب أفريقيا.
فالجهة الأخرى، الأرقام كشفت على واحد التغيير كبير فالموضوع ديال السوريين، اللي كانوا هما اللي عامرين بيهم الطرقان ديال أوروبا لسنوات. فبعدما كانت قمة الأزمة فـ2015 بـ 600 ألف واحد دخل (وهذا أعلى رقم فالتاريخ)، الأرقام بدات كاتهبط بشوية بشوية، حتى طاحت لمستويات قليلة بزاف فـ2025 و2026. هاد التراجع المباشر جاء من بعد التغييرات الكبيرة والسقوط ديال نظام بشار الأسد فدجنبر 2024، الشي اللي بدل الهجرة ديال السوريين كلياً فشرق المتوسط والبلقان.