خبير فالشؤون الأمنية والدولية لـ”كود”: اللي دارتو إسبانيا فهاد التوقيت ماشي بريء.. غررات بالمغاربة بتأويلات قانونية باش يحرگو .. والرباط خاصها تفتح مفاوضات جدية ومباشرة لاسترجاع سبتة ومليلية .

مصدر الصورة

أميمة عطية – كود كازا ///

بعدما أكد الناطق الرسمي باسم وزارة الداخلية أن محاولات الحريگ الجماعي ل سبتة ومليلية ما كانتش عفوية لبارح 2 الأحد يوليوز ، و كشفت على أن حوالي 40 ألف شخص حاولو يوصلو لسبتة و1135 شخص لمليلية، مع تسجيل 11 وفاة، منها حالة سقوط و10 حالات غرقو.

وفهاد السياق، كال الخبير فالشؤون الأمنية والاستراتيجية والدولية محمد عصام لعروسي، فتصريح خاص لـ”كود”، إن البلاغ ديال وزارة الداخلية كيعطي قراءة واضحة بأن اللي وقع ما يمكنش يتقرا بطريقة بريئة خصوصا فهاد التوقيت لي تحلات فيه لحدود، ولكن كحدث فيه أبعاد أمنية وسياسية.

وكال لعروسي إن مقارنة الأرقام اللي خرج بها المغرب مع المعطيات اللي خرجات من الجانب الإسباني كتبرز باللي كاين توتر أمني، وكاين استعمال ديال أوراق ضغط مختلفة من طرف إسبانيا للاستفادة من هاد الأحداث اللي عرفاتها سبتة ومليلية.

وزاد الخبير في الشؤون الأمنية وأكد على أن التوقيت، حسب قراءتو، ماشي بريء، معتبرا أنه كاينة مؤشرات كتعطي الانطباع بأن إسبانيا سمحات بشكل غير مباشر لعدد من المهاجرين يجربو العبور، واستغلات التأويلات اللي رافقات بعض القرارات القضائية الإسبانية باش توصل للشباب فكرة أن العبور سباحة يمكن يخليهم يفلتو من الإرجاع الفوري.

وكال لعروسي ، إن هاد الشي خلا بزاف ديال الشباب يقتانعو بأن الطريق مفتوح، وزاد ضاف أن إسبانيا ، استغلات هاد الورقة، و حاولت تزيد تحمل المسؤولية للدولة المغربية، واعتمدات فهادشي على الإعلام ووسائل التواصل الاجتماعي باش تروج لصورة لهشاشة لي كيعيشوها هاد لفئة.

وأكد لخبير في الاستراتيجيات الدولية ، أن بلاغ وزارة الداخلية، واخا جا بصيغة دبلوماسية وبروتوكولية، ما زال كيأكد على استمرار التعاون والتنسيق بين المغرب وإسبانيا، وهو ما كيبين، أن الرباط ما باغياش تخسر مدريد رغم حساسية الملف.

وكال لعروسي إن وسائل التواصل الاجتماعي لعبات دور كبير فالتغرير بالشباب، بعدما تم الترويج لمعلومات خاطئة واستغلال الهشاشة الاجتماعية ديال فئات واسعة، مضيفا أن بعض وسائل الإعلام بالغات حتى هي فطريقة نقل صورة الأحداث.

وشدد الخبير على أن ورقة الهجرة غير النظامية ولات من أصعب الملفات بالنسبة لإسبانيا، سواء على المستوى الأمني أو الاقتصادي، معتبرا أن سبتة كتعيش وضع خاص وما يمكنش تستوعب هاد الأعداد باش تصاوب ليهم لوراق داكشي علاش وهمو شباب .

وختم لعروسي تصريحو لـ”كود” بالقول إن المغرب خاصو يدير هاد الملف فوق طاولة المفاوضات مع إسبانيا، ويفتح نقاش مباشر حول استرجاع سبتة ومليلية والجزر الجعفرية، معتبرا أن هاد الظرفية خاص الرباط تستغلها سياسيا ودبلوماسيا.