قرر وكيل الملك فالمحكمة الابتدائية ديال خنيفرة، اليوم الاثنين، باش يتابع شي مرا فحالة اعتقال احتياطي مع شخص آخر فحالة سراح بسبب قضية عندها علاقة بالنصب عن طريق وعود بالعمل فالديوانة.

المصادر ديال “كود” كشفت باللي النيابة العامة قررت بعد استنطاق المتهمة الأولى “ا.ح” متابعتها فحالة اعتقال بالحبس المحلي من أجل “النصب، واستغلال النفوذ المفترض”، فيما تابعت الثاني “ت.ي” فحالة سراح من أجل “تقديم رشوة”.

هاد القضية تفجرات بعدما تقدمات إدارة الجمارك والضرائب غير المباشرة بشكاية ضد المتهم الثاني، معزز بمحضر الاستماع ليه من طرف أعضاء لجنة مباراة توظيف حراس الديوانية، بعدما اكد ليهم انه نجاح وعطا رشوة لشي مرا باش يدوز فهاد الكونكور.

المصلحة الجهوية ديال الجدارمية فخنيفرة مني سمعو لهاد المرشح اكد باللي تعرف على المتهمة الأولى وعبرت ليه باللي غادي تتوسط ليه مع شي حد من أجل الحصول على منصب شغل بإدارة الديوانة وذلك مقابل مادي وصل لـ8 مليون سنتيم، حيث أودع لفائدتها كتسبيق مبلغ 2000 درهم فالحساب ديالها البنكي، وعطاها 6 مليون نقدا وزاد صيفط ليها مليون سنتيم عبر حوالة مصرفية.

وخلال 29 مارس الماضي دوز هاد المرشح بنجاح الاختبار الكتابي، لكن لم يتفوق في اجتياز اختبار الكفاءة البدنية وغادر المعهد وأخبرها بالأمر فطلبت منه العودة إلى المعهد والتصريح للمسؤولين بنجاحه في اختبار الرياضة، وهو عكس ما تبين بعد تنقيطه عبر الحاسوب.

وحسب المصادر ديال “كود”، فإنه بعد محاصرة المتهم بعدد من الأسئلة اللي توجهات ليه من طرف أعضاء اللجنة اعترف أنه عطا مبلغ ديال 7 مليون للمتهمة الأولى من أجل حصوله على هاد الوظيفة.

المهم السيدة، وفق المصادر ذاتها، حصلات وتشدات بعدما زربات النيابة العامة عليها ودارت فحقها مذكرة بحث على الصعيد الوطني، حيث تم توقيفها من طرف الضابطة القضائية وتقديمها أمام العدالة اللي هبطاتها للحبس.