كازا.. متضررو مشروع “المحج الملكي" رجعو كيحتجو قدام عمالة انفا.. وسكان المدينة القديمة لـ " كود" : بغينا الاستفادة كيگولو لينا ما طلعناش فالسيستيم وحنا كنطالبو بفتح تحقيق عاجل فلوائح لي استافدو من البارطمات .

مصدر الصورة

أميمة عطية – كود كازا ///

عمالة مقاطعات الدار البيضاء-أنفا، هاد صباح اليوم الاثنين 20 يوليوز ، تنظيم وقفة احتجاجية جديدة من طرف عدد من الأسر المتضررة من عمليات الهدم المرتبطة بمشروع “المحج الملكي”، وهادشي للمطالبة بإنصافها وتسوية ملفاتها المتعلقة بإعادة الإيواء والاستفادة من لبارطمات ديالهم.

وفي تصريحات مختلفة لـ”كود”، أكد عدد من المحتجين أن معاناتهم باقي مستمرة، معتبرين أنهم تضرروا بشكل مباشر من عمليات الهدم، لكن أسماءهم مازال ما تدرجاتش ضمن لوائح المستفيدين من إعادة الإيواء أو الدعم.

وكالت واحدة من المحتجات: “حنا ساكنين هنا من سنين، وتفاجأنا بالهدم، واليوم باقين كنطالبو غير بحقنا فالسكن الكريم، وفينما كنسولو كيقولو لينا ما طلعناش فالسيستيم، وما بغيناش نكونو ضحية ديال هاد الاستفادات .”

وأضاف محتج آخر: “من هاد الصباح وحنا واقفين قدام العمالة، كنطلبو من المسؤولين يفتحوا تحقيق فطريقة إعداد اللوائح، حيت كاينين عائلات معروفة فالحي ما لقاوش سميتهم، وفالمقابل كاين اللي تدرجو وما عندهمش علاقة بالمنطقة.

وأكدت محتجة أخرى، في تصريح لـ”كود”: “الوليدات ديالنا بقاو بلا استقرار، وحنا اليوم مهددين بالتشرد، ومعندناش باش نكريىو خاص يكون حل مستعجل، وما نبقاوش كل مرة كنحتجو باش نوصلو صوتنا.”

المتضررون جددوا مرا اخرى، مطلبهم بضرورة مراجعة لوائح الإحصاء وإدراج جميع الأسر المستحقة فسيسيتيم، ويعطيو حلول سكنية بزربا، خصوصاً بالنسبة للعائلات المنحدرة من لسكان لمدينة لقديمة فدرب الرماد، وموحى أوسعيد، والحيداوي، وغيرهم .

وللإشارةفقط ، فإن مشروع “المحج الملكي” يعد من أكبر مشاريع إعادة تهيئة المدينة القديمة بالدار البيضاء، وكيهدف إلى إعادة تأهيل المجال الحضري
بين مسجد الحسن الثاني وساحة محمد الخامس، و تحسين البنيات التحتية والفضاءات العمومية وإعادة هيكلة عدد من الأحياء.

ومن جهتها، كانت السلطات المحلية أكدت في مناسبات سابقة أن عملية إعادة الإيواء كتتم وفق معايير قانونية، فلكيشي يونيك ،باش تكون الاستفادة .