حزب التجمع الوطني للأحرار سبق جميع الأحزاب وحط برنامجو الانتخابي وبدا كيشرحو فالمدن والأقاليم؛ برنامج غني بالأرقام وكيقترح حلول عملية لمشاكل المغاربة.

“كود” اطلعت على تفاصيل البرنامج واللي فيه اقتراحات مهمة فالجانب الاجتماعي، أبرزها آلية مبتكرة تحت اسم “درع للادخار”. هاد المبادرة كتهدف أساساً لإدماج المواطنين اللي ما عندهمش دخل ثابت، بحال أصحاب المهن الحرة، الحرفيين، والشغيلة اللي فالقطاع غير المهيكل، باش يعاونوهم يواجهو تقلبات الزمان ويحققوا الاستقلالية المالية.

الاقتراح ديال الأحرار بخصوص الادخار لهاد الفئة غير المهيكلة، كيقوم على فتح حساب ادخار مبسط ومزدوج الوظيفة، يقدر المواطن يسيرو بكل بساطة غير من التلفون المحمول ولا عبر شبابيك القرب، بالاعتماد على السجل الوطني للسكان. هاد الحساب مقسوم لـ جوج ديال الأجزاء متكاملين:

الأول: ادخار احتياطي (30% من الإيداع)، هاد الفلوس مخصصة لمواجهة الطوارئ والأزمات اليومية والنفقات غير المتوقعة، ولّي ممكن المستفيد يسحبها بشكل فوري وفأي وقت بغا بلا قيود، لمنحه شبكة أمان مالي يومية (هاد الشق لا تشارك فيه الدولة بالدعم).

الثاني: ادخار للمستقبل (70% من الإيداع): هادو فلوس كتجمع على المدى المتوسط أو الطويل، وموجهة لتمويل مشاريع مستقبلية أو تغطية نفقات مهمة (بحال تجهيز نشاط مدر للدخل، مصاريف التمدرس، أو السكن). ومقابل هاد الالتزام بالادخار، الدولة كتعطي تحفيز قوي ومباشر كيوصل لـ 25% كدعم كيزاد على هاد الشق المستقبلي.

وبلغة الأرقام الدقيقة المأخوذة من المثال التوضيحي للبرنامج: إلى حط المواطن 250 درهم شهرياً، الحساب كينقسم تلقائياً لـ 75 درهم (ادخار احتياطي) و175 درهم (ادخار للمستقبل). الدولة هنا كتدعم الشق المستقبلي بـ 43,75 درهم شهرياً (أي 25% من 175 درهم)، ليصبح إجمالي المبلغ المتراكم للمواطن هو 293,75 درهم شهرياً.

وبعد مرور 12 شهراً فقط، يتيح هاد النظام للمستفيد تكوين رأسمال إجمالي يبلغ 3.525 درهم (دون احتساب الفوائد)، من بينها 525 درهم كمساهمة مباشرة من الدولة، و900 درهم كتبقى متاحة بشكل فوري كادخار احتياطي.

وقياساً على نفس المعادلة العلمية للبرنامج، فإلى قام المواطن بادخار 5.000 درهم (على مدى فترة الادخار)، فإن حصة الادخار للمستقبل كتكون هي 3.500 درهم، وكتزاد عليها 875 درهم كدعم مباشر وصافي من الدولة.

بذلك، كيسعى حزب الأحرار من خلال “درع الادخار” باش يرجع الادخار من مجرد ممارسة مالية بسيطة، لرافعة حقيقية نحو الاستقلالية والاندماج الاقتصادي، بما يمنح المواطن أدوات ملموسة لبناء مستقبله بكل كرامة وثقة.