واش معدات النظافة اللي رجعات جماعة كازا غادي تولي عبء مادي جديد.. وغادي تزاد فالميزانية الضخمة لي مخصصة لهاد الملف ؟ .

مصدر الصورة

أميمة عطية – كود كازا ///

لقات جماعة الدار البيضاء راسها قدام ملف جديد من بعد ما بدات كتسترجع الآليات والمعدات اللي كانت عند شركات التدبير المفوض ديال النظافة، من بعد ما سالات مدة عدد من العقود اللي كانت كتدبر هاد المرفق.

وحسب معطيات متداولة، فإن عملية التسلم بينات أن جزء من هاد المعدات ما بقاش فالحالة اللي تسمح ليه يرجع للخدمة بشكل عادي، بعدما بانت على بعض الماكينات علامات الاستعمال الكبير، وزادت عليها أعطاب كتحتاج تدخلات تقنية وصيانة قبل إعادة تشغيلها.

ومن جهة اخرى، فهاد لوضع كيخلينا نستفسرو على جاهزية المعدات اللي غادي تعتمد عليها الجماعة فواحد القطاع حساس بحال النظافة، خصوصاً وأن كازا كتنتج كميات كبيرة ديال زبل بشكل يومي، وأي نقص فالآليات يقدر يأثر على وتيرة جمعها والتدخلات فالأحياء.

وبنسبة لتدبير الملف فجا فواحد السياق اللي فيه مجلس جماعة الدار البيضاء كان صادق، فدورة 19 يونيو 2026، على مجموعة ديال الإجراءات لإعادة ترتيب قطاع النظافة، من بينها الاتفاقيات والملحقات التعديلية الخاصة بالقطاع بميزانية وصلات لـ133 مليار سنتيم.

وزاد المجلس صادق على اتفاقية انتداب شركة التنمية المحلية “الدار البيضاء للبيئة” باش تتكلف بتتبع ومراقبة جودة الخدمات اللي كتقدمها الشركات المفوضة، وتقوية المراقبة على طريقة الاشتغال فالميدان.

وكانت عرفات الدورة المصادقة على تحويلات مالية مرتبطة بالمخصصات المرصودة لبعض المقاطعات، بحال أنفا والحي الحسني وعين الشق وسيدي بليوط، بهدف تحسين التدبير المالي والاستجابة للحاجيات المطروحة.

ولكن وسط هادشي ، كيبقى السؤال مطروح حول مصير الآليات اللي رجعات للجماعة، واش غادي تكون غير محتاجة للصيانة وترجع تخدم، ولا غادي تفرض مصاريف إضافية على ميزانية لمخصصة لقطاع النظافة بسبب حجم الإصلاحات المطلوبة .