الحركة القندوحية أو حينما يواصل بنكيران تطبيز العين اعتذار أقبح من زلة .

مصدر الصورة

فاطنة لويزا – كود//

وكما كان منتظرا، خرج سي عبد الإله بنكيران، باش يسحب كلمة قندوح، لي استعملها في وصف زوج مستشارين ملكيين وشي وحدين آخرين معرفناش شكون كيقصد… كان لي غيقول بلي كلمة قندوح ما قصدش بيها الهمة وأزولاي، يمكن… ولكن السياق ماشي فصالح بنكيران، حيت أي واحد عطيتيه يسمع الفيديو كامل، غيفهم أن أزولاي، حسب بنكيران، “قندوح”، وكذلك الهمة… واخا، ميليشيات بنكيران في السوشل ميديا خرجات كتدافع عليه، ولكن ما شفنا حتى قيادي من قيادات البيجيدي خرج يدافع عليه… وهادشي كيعني أن حتى الإخوان في قيادة الحزب، معجبهمش هاد الأوصاف…

ولي أكد لي هادشي، أني التقيت مع قيادي في البيجيدي بطلب مني، وهو إعلاميا كيتوصف بواحد من صقور الحزب، ومقرب من بنكيران، وكيظل بنكيران يشكر فيه، خصوصا أن بنكيران كان كيعتبر هاد القيادي، فواحد المرحلة، أنه ضدو، وأنه كيدير ليه المشاكل…
ولكن، فاش القيادات الكبيرة بعدات من بنكيران، ومنهم الناس لي صنعهم، أو لي كانوا معاه من مرحلة الشبيبة، هاد القيادي، على العكس، وقف مع بنكيران ودافع عليه…
المهم، هاد القيادي غيصرح لي بلي ما متفقش مع بنكيران في كلمة قندوح… أكثر من ذلك، عبر لي على الخوف ديالو من تداعيات ديال ديك الوصف، وكان خايف من صدور شي بلاغ من الديوان الملكي كيجبد للحزب ودنيه…

هاد القيادي غيقولي بلي ما كاين حتى سياق حاليا كيبرر هجوم بنكيران على الهمة وأزولاي، وبلي الحزب ما جاتو حتى إشارة على أنه مستهدف فهاد المرحلة…

على العكس من ذلك، غيصرح لي بلي رياح الانتخابات غادة لصالح البيجيدي، وأن إمكانية الرجوع في الانتخابات بشكل قوي متاحة، بما فيها يكونوا من الأحزاب الأربعة الأولى… وغيصرح بلي، لحد الآن، ما كاين حتى شي تضييقات على المرشحين المعلن عنهم، ولا على أنشطة الحزب والتجمعات ديالو… أكثر من ذلك، غيلمح لي أن علاقاتهم مع نافذين في السلطة حاليا طيبة، وغيلمح للفتيت، وزير الداخلية المشرف على الانتخابات، وللقجع، لي كيتم تقديمو على أنه ممكن يكون رئيس الحكومة المقبلة… بحالا بقا غيقول، إن التيار دايز بينهم وبين جناح قوي في السلطة…
ولذلك، بالنسبة لهاد القيادي، ما كان حتى معنى لخرجة بنكيران، لي ممكن تجبد على الحزب النحل… سولتو: واش خايفانين من بلاغ من الديوان الملكي؟ جاوبني بوضوح، أنه رغم عدم رغبتهم في أنه يكون بلاغ للديوان الملكي، والانتخابات قريبة، ولكن صدور بلاغ من الديوان أفضل من التجاهل…

كيفاش هاد البلان؟
حسب هاد القيادي، فبلاغ من الديوان الملكي كيعني التوبيخ، والحزب مستعد يقدم اعتذار، والتوبيخ كيعني أن الملف تسالى بالتوبيخ والاعتذار وتطوى… أما التجاهل والنخال، كيعني الملف مازال مفتوح، وما نعرفوش آش جاي…
جواب هاد القيادي فكرني فعلاقتنا حنا مع الوالد… كنا، فاش كنغلطو وكيخاصم علينا، كنرتاحو… أما فاش كيقطع علينا الهدرة بمرة، هاداك هو القلق الحقيقي…

عبد الإله بنكيران ولى بحالو بحال مجموعة من “الزعماء” الحقوقيين والنقابيين والسياسيين، لي في سبيل يبقاو حاضرين في الواجهة، ما عندهمش مشكل يريبو حتى التنظيمات ديالهم، المهم يصنعو الحدث… ودابا، مع السوشل ميديا، ولات التكلفة ديال هاد “أنا وبعدي الطوفان”، و”أنا بوحدي مضوي البلاد”، مكلفة بزاف… حيت تطلع فالتراند، راه ماشي شي حاجة صعيبة، حتى الشوهة كتوصل للتراند…
بنكيران كان رئيس حكومة، وكيدير هاد الزبلات… ومن بين الأسباب ديال هادشي، هو أنه ما كيعطيش قيمة للكلام لي كيقول، وللصفة ديالو، سواء كرئيس حكومة أو رئيس حزب… الناس لي كتحترم الصفة ديالها، والمخاطبين، والمهام لي عندها، كتعطي قيمة للمسؤولية لي عندها، كتحضر مزيان لآش غادي تقول… وخاص يكون معها فريق، جزء منهم حرايفية في السياسة، وجزء حرايفية في التواصل… وقبل كل خرجة، كيحددو أهم النقط لي خاص التركيز عليها، وشحال المدة لي ما خاصهاش تتجاوز فالخطاب، وحتى تحديد بعض الجمل لي خاص تتقال…
بنكيران، للأسف، كيعتقد بلي مازال عندو البراعة في التواصل، والقدرة على تحليل اللحظة… في حين أن لي كان نافع في 2011، ما نافعش اليوم… وهادشي لي خلا بنكيران يدخل في نوع من الرتابة… نفس المضمون كيكررو فين ما مشا، وهادشي لي كيفسر علاش ما بقاش قادر يجمع الناس في مهرجانات خطابية، وحتى المباشرات ديالو ما بقاتش كتعرف ديك المتابعة الكبيرة لي كانت… الحاجة الوحيدة لي كترجعو للواجهة، الواجهة الإعلامية ماشي السياسية، هي فاش كيشير على شي واحد أو شي جهة بشي معاطية وصافي… أحيانا كيتعاطى حتى مع صحافيين ومع مؤثرات في السوشل ميديا…

دابا نرجعو للهمة ولأزولاي… لي متابع السوشل ميديا غيلاحظ أن المستشار الملكي فؤاد عالي الهمة كيتعرض لواحد الحملة ممنهجة في السوشل ميديا، لي فيها تحالف ديال شبكة الابتزاز الرقمي، وكذلك الوجوه المحسوبة على الكابرانات ديال الجزائر، وزيد حتى نوع من الصحافة الفرنسية والإسبانية لي معروف الارتباطات ديالها المخابراتية…

وهنا كيتطرح سؤال: واش بنكيران واعي بهاد السياق؟ ولا عاجبو؟
أزولاي، المعروف عليه أنه بعيد على الصراعات الحزبية والسياسية، وأنه كيركز فخدمتو على العلاقات الخارجية، وعلى شبكة صحاب العلاقات العالميين لي ممكن يجيبو استثمارات، وأهم حاجة على الدبلوماسية الثقافية… يعني، عيبو بعيد… في الصويرة لي فيها هاجم بنكيران أزولاي، كان على بنكيران أنه يقدم أزولاي أنه النموذج لي كيتهلا فالمدينة لي جاي منها، بلا ما يستفد حتى حاجة… شحال من فضائح عقارية وتدبيرية كانت فالصويرة، ولكن عمر شي حد جبد أزولاي كمستفيد، أو متواطئ، أو عندو شي علاقة بأي شبهة فساد… يا ريت كل مدينة يكون عندها شي حد بحال أزولاي، قلبو عليها…
وحتى فاش جبد قضية اللون لي تصبغات بيه الصويرة، بان بنكيران كيخربق، وتابع هبال المقرئ الإدريسي أبو زيد… حيت لي كان مطروح، هو صباغة المباني في الصويرة بالأبيض، وصباغة الأبواب والشراجم بالزرق… وهادشي ما عندو حتى علاقة بإسرائيل، كيما توهم المقرئ المسكون بالمؤامرات المضحكة… حيت فتقاليد المدن المغربية العتيقة، حتى قبل نشوء إسرائيل، المدن الساحلية كتصبغ الشراجم والبواب بالزرق، والمدن الداخلية لي فيها شي قبة ديال ولي، كتصبغ الأبواب والشراجم بالأخضر، بحال وزان وبجعد، والمدن الجبلية كتدير لون تربة المنطقة ديالها…

في الأخير ، بنكيران، عبر صفحة فريد تيتي، السائق ديالو، غادي يعتذر على قندوح، ولكن غيأكد مضمون المداخلة ديالو… هاد المضمون لي حتى حد ما فاهمو، ولي ممكن يكون براسو نساه…