ملايير فالعقود الجديدة والشركات تبدلات.. كازا كتواجه تحدي كبير فالنظافة ومجلس الجماعة كيوضح سبب انتشار هاد الأزبال .

مصدر الصورة

أميمة عطية – كود كازا///

كتعرف عدد من أحياء وشوارع مدينة الدار البيضاء، فهاد الأيام لخرا ، انتشار زبل لي مجموع ومليوححدا بركاصات ، بعدما ولات عامرا فعدد من النقط، وسط استياء الساكنة اللي طالبت بتدخل سريع باش ترجع خدمات النظافة للمستوى اللي كانت عليه.

هاد الوضع جا مع بداية تنزيل عقود التدبير المفوض الجديدة لقطاع النظافة، بعدما سالات العقود السابقة فلخر شهر يونيو، ودخلات الشركات الجديدة باش تبدا تدبير المرفق فعدد من مقاطعات العاصمة الاقتصادية.

وهادشي كان متوقع ، بعدما سبق لأعضاء
من مجلس لمدينة ، فدورة يونيو اللي حضرتها “كود”، أنهم نبهوا إلى أن مرحلة الانتقال بين الشركات القديمة والجديدة ممكن تعرف صعوبات مؤقتة، خصوصاً فواحد القطاع حساس بحال النظافة .

وكتجي هاد لمرحلة بعدما صادق مجلس جماعة الدار البيضاء على عقود النظافة الجديدة التكلفة المالية الإجمالية ديالها 1.2 مليار درهم (حوالي 120 مليار سنتيم) لتغطية مختلف مناطق العاصمة الاقتصادية، مع تسجيل زيادات إضافية قدرها 30 مليون درهم ارتبطت بتقلبات أسعار المحروقات، مما رفع التكلفة التقديرية في بعض النقاشات إلى 153 مليار سنتيم.

وكان وضحو من قبل أعضاء بالمجلس أن هاد تحول ماشي غير مسألة تغيير الشركات، ولكن كيرتبط حتا بعمليات تسليم المعدات والآليات، انتقال العمال، وضمان استمرارية الخدمة، وهي عوامل ممكن تأثر على السير العادي للمرفق فلأيام لولو..

ومن بين هاد لآثار لي خلا هاد الانتقال ولبلوكاج، وحسب ما عاينات “كود” فجولات ميدانية متفرقا دارتها فعين السبع ، لمدينة ، محطة ولاد زيان ، انتشار زبل وروايح لخايبا فصورة ما كينسجمش مع صورة مدينة بحجم الدار البيضاء ، وزادت من استياء لببضاويين.

ومن جهتهم، كانو أكدو أعضاء من مجلس كازا، فتصريحات إعلامية مختلفة أن هاد شي غير مرحلة انتقالية ووضح مجلس الجماعة أن بعض الأحياء مازال كيعرف تفاوت فمستوى الخدمة، وهو وضع ما كيعكسش، حسبها، الجودة اللي كيتطلع ليها المجلس والساكنة، ولا الالتزامات اللي جاية فدفاتر التحملات الجديدة.

ودعى لمجلس فهاد السياق ، كبار منتجي النفايات، من محلات تجارية وقهاوي وريسطورات وأىطيلات وأسواق وغيرها، باش احترامو المقتضيات الخاصة بتدبير الأزبال ، وعدم استعمال الحاويات المخصصة للأزبال المنزلية.

وكيبقى ملف النظافة واحد من أكبر التحديات اللي كتواجه الدار البيضاء، خصوصاً مع دخول العقود الجديدة حيز التنفيذ، وسط انتظار الساكنة باش تبان نتائج هاد المرحلة الانتقالية على أرض الواقع، وتتحسن صورة المدينة فالأحياء والمرافق العمومية.