فاليوم العالمي للبيئة. خبير المناخ فلالي لـ"كود": المغرب ما يقدرش يحارب التغيرات المناخية بوحدو .

مصدر الصورة

أميمة عطية كود كازا ///

واخا الشتا المهمة اللي عرفتها بلادنا خلال الموسم الفلاحي 2025-2026 بعد أعوام ديال الجفاف، إلا أن الفيضانات والسيول اللي شهداتها عدد من المدن والمناطق رجعات للنقاش سؤال كبير حول مدى جاهزية البلاد للتعامل مع التحولات المناخية المتسارعة.

وفهاد السياق، وبمناسبة اليوم العالمي للبيئة، لي كيكون نهار 6 يونيو من كل عام، أكد حكيم فلالي، الباحث والأستاذ فعلم المناخ بجامعة الحسن الثاني بالدار البيضاء، فتصريح لـ”كود”، أن التغيرات المناخية ولات واقع عالمي ما كايناش حتى دولة قادرة توقفو أو تحارب مخاطرو بوحدها، مشيرا أن المغرب كيبقى من بين البلدان الأكثر عرضة للتهديدات المناخية بسبب خصوصياته الطبيعية والمناخية.

ووضح فلالي أن المغرب كيعرف تناوب سنوات جافة وأخرى رطبة، مضيفا أن البلاد عاشت فهاد الفترات لخرا جفاف صعيب، قبل ما تدخل فمرحلة رطبة خلال الموسم 2025-2026، وهو ما بان من خلال التساقطات المهمة اللي عرفتها عدة مناطق من المملكة، وكال إن المشكل ماشي غير شتا ليلة او كثيرة، ولكن فطريقة تدبير الموارد المائية.

وزاد الخبير وكال، إن التساقطات القوية اللي عرفها المغرب تسببت ففيضانات وسيول بعدد من المناطق، بحال آسفي والقصر الكبير ورجّع سبب هاد المشاكل للعوامل العمرانية والبشرية، خاصة التوسع العمراني لي ماشي ملائم واستقرار السكان فمناطق رطبة أو قريبة من الوديان.

وشدد فلالي على أن اليوم العالمي للبيئة كيشكل فرصة حقيقية لإعادة التفكير فطريقة تعامل المغرب مع قضايا البيئة والمناخ، ودعى باش إتدمج البعد البيئي والمائي فمختلف السياسات العمومية، خصوصا فمجالات التعمير والهندسة المعمارية والتخطيط الترابي.

وأكد أن مشاريع التهيئة العمرانية خاصها تاخذ بعين الاعتبار المخاطر المناخية والمائية.

وزاد دعا الباحث باش تعطا أهمية أكبر للغطاء النباتي، مبرزا أن المؤشرات الحالية كتبين تراجعا مستمر فالمجالات الخضراء والغابوية.

وختم فلالي تصريحو بالتأكيد على أن التحدي اليوم ماشي هو التحكم فالمناخ، ولكن التكيف الذكي مع تحولاتو بسياسات مندمجة تجمع بين تدبير الماء، وحماية البيئة، والتخطيط العمراني المستدام، باش ما تبقاش الأمطار الغزيرة كتتحول من نعمة إلى مصدر للفيضانات والخسائر.ال