عافية جماعة الحوازة فسطات : مؤسسة جدور تضامنات مع المتضررين وطالبات باش تكون لجنة تحصي الخسائر وإعلان المنطقة منكوبة .

مصدر الصورة

مصطفى المزابي -كود سطات //

فاجعة كبيرة هزّات دواوير الحوازة بسطات.. النار كلات قرب 2000 هكتار، وماتت ناس، وتضررات عوائل كاملة ، مشهد صعيب خلّى الجميع فحالة حزن وغضب.

مؤسسة جذور لمغاربة العالم أعلنات التضامن الكامل، وطلبات بفتح تحقيق ميداني وإحداث صندوق دعم شفاف باش يوصل العون للناس اللي تضررو بصح ، بعد الحريق المهول اللي خلّف قتلى وجرحى، وحرق مساحات كبيرة ديال الزرع ولي فاقت 2000 هكتار والبهايم بحال البقر والخيل.

وقدام هاد الفاجعة، طلبات المؤسسة فالبيان ديالها من عامل إقليم سطات يعيّن لجنة مختلطة باش تقوم بتقييم دقيق للخسائر، باش يتحدد حجم الضرر ويتعطى الدعم للناس اللي تضررو بالشكل المطلوب مقترحة إحداث صندوق خاص للدعم، يكون تحت مراقبة السلطات، باش يكون كلشي شفاف وما يستغلّ حتى واحد معاناة الناس فأغراض سياسية ولا انتخابية.

ودعات فهذا البيان حتى الفلاحة اللي ما وصلاتهومش العافية باش يعاونو خوتهم المتضررين من بعد الحصاد، بالحبوب والتبن والمواد الأساسية، وبتنسيق مع السلطات باش يخففو عليهم الضغط ، بعدها اعلن المكتب التنفيذي للمؤسسة حتى هو على أنه غادي يقدم مساعدة مادية مباشرة للمتضررين، غادي تمر عبر القنوات الرسمية.

وفي هذا السياق مع هاد الخسائر الكبيرة اللي وصلات لحوالي 2000 هكتار من المحصول الزراعي، بزاف ديال الناس كيتساءلو واش الدولة ولا الحكومة غادي تعلن جماعة الحوازة “منطقة منكوبة” ، هاد الإعلان إلا وقع غادي يفتح الباب للدعم الاستعجالي والتعويضات، ويعطي أولوية لإعادة تأهيل المنطقة والفلاحة اللي تضررات الساكنة دابا كتسنّى الجواب الرسمي فهاد الموضوع.