سوق قصبة تادلة شاعل.. مول المليح باع وراح واللي تعطل شرا بالغلا وبنادم فالرحبة  كثر من البهايم .

مصدر الصورة

كود – عثمان الشرقي//

فآخر نهار من سوق البهايم بمدينة قصبة تادلة، دارت “كود” جولة وسط رحبة الغنم، الكسابة هاد المرة ناشطين حيت السومة طلعات ليهم المعنويات وما قاداهم فرحة.

منين سولناهم على خبار السوق، كان الجواب شبه موحد: البهايم قليلة، والشراية كثار، وهاد المعادلة هي لي خلات الثمن يطلع.

عبد الرحيم كساب قال لـ”كود” بلي الحوالا لي كانو دايرين ليهم 90 ألف فالسيمانة لي فاتت، باعها اليوم بـ130 ألف، وحتى “العبورة” لي كانت عندو ساوية 40 ألف، وصلات لـ75 ألف.

وكيشرح عبد الرحيم السبب: “الشرايا كثار والبهايم مداخلاش بزاف للسوق، وكلشي تكب فدقة وحدة ”.

كساب آخر سميتو بناصر، قال بلي السوق ما غاديش يتقاد دغية، إلا ما صباتش الشتا مزيان سبع سنين متابعة، وبخصوص قلة البهايم، بناصر رجع السبب لعدة عوامل، من بينها قرار منع ذبح “العبورات”، لي خلا الگزارة يتكاو على الخرفان حتى نقصو فالسوق، وزيد عليها الجفاف لي كان قبل والغلا ديال العلف، الشي لي خلا بزاف ديال الكسابة يبيعو البهايم ويبدلو الحرفة.

أما مولود، كساب جاي من واد زم، قال لـ”كود” بلي السوق كان مستقر حتى للسيمانة لي فاتت، ومن بعد بدا الثمن كيطلع دقة وحدة، مولود ربط هاد الارتفاع بالإقبال المفاجئ ديال الشراية فآخر لحظة، خصوصاً بعدما توصلو الموظفين بالخلاص قبل الوقت وقال بالحرف: “الناس كاملين تسناو حتى قرب العيد، ومني هبطو كاملين يشريو دقة وحدة، السوق شعل”.

كساب اخر كيبيع غير من البيكوب بالمزايدة قال لنا بلي الزيادة اليومية فالثمن بدات من نهار الخميس 21 ماي، الشي لي كينطق مع ملاحظة كود سابقا بحيث السوق بدا كيزيد تقريباً بنسبة 7 فالمية كل نهار من نفس التاريخ ، حتى ولات بعض البهايم كتفوت القيمة الحقيقية ديالها ب 40 فالمية اليوم .

ومن خلال الجولة لي دارتها “كود” فسوق قصبة تادلة، كيبان بلي أنه لي شرى بكري هو لي ربح ، اما لي بقى حتى آخر نهار ، لقا راسو قدام أثمنة طالعة وقلة فالاختيار،الحاصول الكسابة كيرجعو السبب الرئيسي لغلا لارتفاع ثمن العلف والجفاف، فحين كاينين الناس لي كيشوفو ان شناقة هوما السبب.

https://www.facebook.com/share/v/18fwxpsofQ/